ಗೃಹ ಜ್ಯೋತಿ ಉಚಿತ ವಿದ್ಯುತ್​ ಬಳಕೆ – ಈ ಮೂರು ಲೆಕ್ಕ ತಿಳಿದುಕೊಳ್ಳಿ..!

ಗೃಹಜ್ಯೋತಿ ಯೋಜನೆ ಸಂಬಂಧ ಇಂಧನ ಸಚಿವ ಕೆ ಜೆ ಜಾರ್ಜ್​ ಅವರು ಬೆಂಗಳೂರಲ್ಲಿ ವಿವರವಾದ ಮಾಹಿತಿ ನೀಡಿದ್ದಾರೆ. 

ಬಾಡಿಗೆದಾರರಿಗೂ ಗೃಹ ಜ್ಯೋತಿ ಲಭ್ಯ:

ಆಧಾರ್​ ಕಾರ್ಡ್​ ಸಂಖ್ಯೆಯನ್ನು ಆರ್​ಆರ್​ ನಂಬರ್​​ಗೆ ಲಿಂಕ್​ ಮಾಡ್ಬೇಕು. ಬಾಡಿಗೆದಾರರಾಗಿದ್ದರೆ ಬಾಡಿಗೆ ಕರಾರುಪತ್ರವನ್ನೂ ಅಪ್​ಲೋಡ್​ ಮಾಡ್ಬೇಕಾಗುತ್ತದೆ. ಒಂದು ವೇಳೆ ಬಾಡಿಗೆಕರಾರರು ಪತ್ರ ಇಲ್ಲದೇ ಹೋದಲ್ಲಿ ವೋಟರ್​ ಐಡಿಯನ್ನು ಆರ್​ಆರ್​ ನಂಬರ್​ಗೆ ಜೋಡಿಸಬೇಕಾಗುತ್ತದೆ.

ಬೆಂಗಳೂರು ಒನ್​, ಕರ್ನಾಟಕ ಒನ್​, ಗ್ರಾಮ ಒನ್​ನಲ್ಲಿ ಅರ್ಜಿ ಸಲ್ಲಿಸಲು ಅವಕಾಶ ಸಿಗುತ್ತದೆ. ಜೂನ್​ 15ರಿಂದ ಅರ್ಜಿ ಸಲ್ಲಿಕೆ ಆರಂಭವಾಗಲಿದೆ.

ಮೂರು ಲೆಕ್ಕ:

1. ಮಾಸಿಕ ಸರಾಸರಿ+ಹೆಚ್ಚುವರಿ ಶೇಕಡಾ 10ರಷ್ಟು ಯುನಿಟ್​ನ್ನಷ್ಟು ವಿದ್ಯುತ್​ನ್ನು ಬಳಸಿದರೆ  ವಿದ್ಯುತ್​ ಶುಲ್ಕ ಪಾವತಿಸಬೇಕಿಲ್ಲ. ಈ ಯೋಜನೆಯಲ್ಲಿ ವಿದ್ಯುತ್​ ಬಳಕೆಯ ಜೊತೆಗೆ ಇತರೆ ತೆರಿಗೆಯಾಗಲೀ ಅಥವಾ ನಿಗದಿತ ಶುಲ್ಕ ಕೊಡಬೇಕಾಗಿಲ್ಲ.

ಉದಾಹರಣೆ: 2022ರ ಏಪ್ರಿಲ್​ 1ರಿಂದ ಈ ವರ್ಷದ ಮಾರ್ಚ್​ 30ರವರೆಗೆ ಮಾಸಿಕ ಸರಾಸರಿ ವಿದ್ಯುತ್​ ಬಳಕೆ 90 ಯುನಿಟ್​. ಹೆಚ್ಚುವರಿ ಶೇಕಡಾ 10ರಷ್ಟು ಯುನಿಟ್​ ಬಳಕೆಗೆ ಅವಕಾಶ. ಅಂದರೆ 90+9 ಅಂದರೆ 99 ಯುನಿಟ್​ ಸಂಪೂರ್ಣ ಉಚಿತ.

2. ಮಾಸಿಕ ಸರಾಸರಿ +ಹೆಚ್ಚುವರಿ ಶೇಕಡಾ 10ರಷ್ಟು ಯುನಿಟ್​ನ್ನೂ ಮೀರಿ 200 ಯುನಿಟ್​ವರೆಗೆ ವಿದ್ಯುತ್​ ಬಳಸಿದರೆ ಆಗ ಮೀರಿ ಬಳಸಿದ ವಿದ್ಯುತ್​ಗಷ್ಟೇ ಶುಲ್ಕ ಪಾವತಿಸಬೇಕಾಗುತ್ತದೆ. ಆದರೆ ಹೆಚ್ಚುವರಿ ಮಿತಿಯನ್ನೂ ಮೀರಿ ವಿದ್ಯುತ್​ ಬಳಸಿದರೆ ಆಗ ಶುಲ್ಕದ ತೆರಿಗೆ ಮತ್ತು ಫಿಕ್ಸೆಡ್​ ಜಾರ್ಜ್​ ನೀಡಬೇಕಾಗುತ್ತದೆ.

ಉದಾಹರಣೆ: ಮಾಸಿಕ ಸರಾಸರಿ ವಿದ್ಯುತ್​ ಬಳಕೆ 90 ಯುನಿಟ್​. ಹೆಚ್ಚುವರಿ ಶೇಕಡಾ 10ರಷ್ಟು ಯುನಿಟ್​ ಬಳಕೆಗೆ ಅವಕಾಶ. ಅಂದರೆ 90+9 ಅಂದರೆ 99 ಯುನಿಟ್.

ಒಂದು ವೇಳೆ 99 ಯುನಿಟ್​ಗಿಂತ ಹೆಚ್ಚು 200 ಯುನಿಟ್​ ಒಳಗೆ ಉದಾಹರಣೆಗೆ 135 ಯುನಿಟ್​ವರೆಗೆ ಬಳಸಿದರೆ ಆಗ 99-135= 36 ಯುನಿಟ್​ಗಷ್ಟೇ ಶುಲ್ಕ ಪಾವತಿಸಬೇಕಾಗುತ್ತದೆ. 

3. ಒಂದು ವೇಳೆ 200 ಯುನಿಟ್​ಗಿಂತ ಮೇಲ್ಪಟ್ಟು ವಿದ್ಯುತ್​ ಬಳಸಿದರೆ ಆಗ ಸಂಪೂರ್ಣ 200 ಯುನಿಟ್​ಗೂ ವಿದ್ಯುತ್​ ಶುಲ್ಕ ಪಾವತಿಸಬೇಕಾಗುತ್ತದೆ.