ಟೆಲಿಕಾಂ ಕ್ಷೇತ್ರಕ್ಕೂ ಅದಾನಿ ಲಗ್ಗೆ – 5ಜಿ ತರಂಗಾಂತರ ಹರಾಜಿನಲ್ಲಿ ಭಾಗಿ

ಉದ್ಯಮ ಕ್ಷೇತ್ರದಲ್ಲಿ ತನ್ನ ಸಾಮ್ರಾಜ್ಯವನ್ನು ವಿಸ್ತರಿಸಿಕೊಳ್ಳುತ್ತಿರುವ ಗುಜರಾತ್​ ಮೂಲದ ಗೌತಮ್​ ಅದಾನಿ ದೇಶದ ಅತ್ಯಂತ ಮಹತ್ವಾಕಾಂಕ್ಷೆಯ 5ಜಿ ತರಂಗಾಂತರ ಹರಾಜು ಪ್ರಕ್ರಿಯೆಯಲ್ಲಿ ಭಾಗವಹಿಸುವ ಮೂಲಕ ಟೆಲಿಕಾಂ ಕ್ಷೇತ್ರಕ್ಕೂ ಅದಾನಿ ಲಗ್ಗೆ ಇಟ್ಟಿದ್ದಾರೆ.

ರಿಲಯನ್ಸ್​ ಜಿಯೋ, ಏರ್​ಟೆಲ್​, ವೋಡಾಫೋನ್​ ಐಡಿಯಾ ಜೊತೆಗೆ ಅದಾನಿ ಕಂಪನಿ ಕೂಡಾ ಹರಾಜು ಪ್ರಕ್ರಿಯೆಯಲ್ಲಿ ಭಾಗವಹಿಸಿದೆ ಎಂದು ತಿಳಿದುಬಂದಿದೆ.

ಜುಲೈ 12ರೊಳಗೆ ಮಾಲೀಕತ್ವದ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ. ಜುಲೈ 18ರಂದು ಹರಾಜು ಪ್ರಕ್ರಿಯೆ ನಡೆಯಲಿದೆ.

ದೈತ್ಯ ಡಾಟಾ ಕಂಪನಿಯನ್ನು ಕಟ್ಟುವುದು ಗೌತಮ್​ ಅದಾನಿ ಮಹತ್ವಾಕಾಂಕ್ಷೆ. ಇದಕ್ಕಾಗಿಯೇ ಈಗಾಗಲೇ ಎಡ್ಜ್​ಕಾನೆಕ್ಸ್​ ಜೊತೆಗೆ ಶೇಕಡಾ 50:50 ಪಾಲುದಾರಿಕೆ ಒಪ್ಪಂದ ಆಗಿದೆ. ನವಿ ಮುಂಬೈ, ಚೆನ್ನೈ, ವಿಶಾಖಪಟ್ಟಣ, ಹೈದ್ರಾಬಾದ್​ ಮತ್ತು ನೋಯ್ಡಾದಲ್ಲಿ ಬೃಹತ್​ ಡಾಟಾ ಕೇಂದ್ರಗಳು ತಲೆ ಎತ್ತಲಿವೆ.

ಈ ಮೂಲಕ ಅಮೆಜಾನ್​ ಮತ್ತು ಗೂಗಲ್​ ಜೊತೆಗೆ ಸ್ಪರ್ಧೆ ಮಾಡುವ ಲೆಕ್ಕಾಚಾರ ಅದಾನಿ ಕಂಪನಿಯದ್ದು.