ಬ್ಯಾಂಕ್ ಸಿಬ್ಬಂದಿಯ ನಿರ್ಲಕ್ಷ್ಯದಿಂದ ವಯೋವೃದ್ಧರೊಬ್ಬರು ಪೂರ್ತಿ ರಾತ್ರಿ ಬ್ಯಾಂಕಿನ್ ಲಾಕರ್ ರೂಮ್ನಲ್ಲಿಯೇ ಕಳೆದಿರುವ ಘಟನೆ ನಡೆದಿದೆ.
ಮಧುಮೇಹ, ಅಲ್ಝೈಮನ್ ಖಾಯಿಲೆಯಿಂದ ಬಳಲುತ್ತಿರುವ 89 ವರ್ಷದ ವೃದ್ಧ ವಿ.ಕೃಷ್ಣರೆಡ್ಡಿಯವರು ಒಬ್ಬರೇ ಬ್ಯಾಂಕ್ನ ಲಾಕರ್ ರೂಮ್ ನಲ್ಲಿ ಇಡೀ ರಾತ್ರಿಯನ್ನು ಕಳೆದ ವ್ಯಕ್ತಿ.
ವಿ.ಕೃಷ್ಣಾರೆಡ್ಡಿಯವರು ಹೈದರಾಬಾದ್ನ ಯೂನಿಯನ್ ಬ್ಯಾಂಕ್ ಬಂಜಾರಾ ಹಿಲ್ಸ್ ಶಾಖೆಯ ಲಾಕರ್ ಕೋಣೆಯಲ್ಲಿ 18 ತಾಸುಗಳ ಸುದೀರ್ಘ ಸಮಯವನ್ನು ಕಳೆದಿದ್ದಾರೆ. ಬ್ಯಾಂಕ್ನ ಸಿಬ್ಬಂದಿ ಪರಿಶೀಲಿಸದೇ ಕೊಠಡಿಗೆ ಬೀಗ ಹಾಕಿ ಸೋಮವಾರ ಸಂಜೆ ಬ್ಯಾಂಕ್ನಿಂದ ಹೊರಬಂದಿದ್ದಾರೆ. ಇದರಿಂದ ಬ್ಯಾಂಕ್ ನ ಲಾಕರ್ ರೂಮ್ನಲ್ಲಿ ಯಾವುದೇ ಮೊಬೈಲ್ ಸಂಪರ್ಕ ಇಲ್ಲದೇ, ಬೆಳಕಿನ ಸಂಪರ್ಕವಿಲ್ಲದೇ ಒಂದು ದೀರ್ಘ ರಾತ್ರಿಯನ್ನು ಕಳೆದಿದ್ದಾರೆ.
ಸಂಜೆಯಾದರೂ ಮನೆಗೆ ಬಾರದೇ ಇದ್ದುದರಿಂದ ಅನುಮಾನಗೊಂಡ ಮನೆಯವರು ಪೊಲೀಸ್ ಠಾಣೆಗೆ ದೌಡಾಯಿಸಿದ್ದಾರೆ. ದೂರು ಸ್ವೀಕರಿಸಿದ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ವಿಶ್ಲೇಷಿಸಿದಾಗ ಸೋಮವಾರ ಸಂಜೆ ಜುಬಿಲಿ ಹಿಲ್ಸ್ ಚೆಕ್ ಪೋಸ್ಟ್ ದಾಟುತ್ತಿರುವುದು ಕಂಡುಬಂದಿದೆ.
ತಾನು ಹೊರಡುವ ಮೊದಲು ಬ್ಯಾಂಕ್ಗೆ ಹೋಗುತ್ತೇನೆಂದು ಹೇಳಿದ್ದಾಗಿ ಕುಟುಂಬಸ್ಥರು ಪೊಲೀಸರಿಗೆ ಮಾಹಿತಿ ನೀಡಿದಾಗ, ಪೊಲೀಸರು ಮಂಗಳವಾರ ಬೆಳಗ್ಗೆ ಬ್ಯಾಂಕ್ನ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶಿಲಿಸಿದ್ದಾರೆ. ಅವರು ಲಾಕರ್ ಕೋಣೆಗೆ ಪ್ರವೇಶಿಸುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಲಾಕರ್ ರೂಮ್ಗೆ ಹೋಗಿ ನೋಡಿದಾಗ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿರುವುದನ್ನು ಕಂಡು ತಕ್ಷಣ ಸಮೀಪದ ಆಸ್ಪತ್ರೆಗೆ ಕರೆದೊಯ್ದು ಪ್ರಥಮ ಚಿಕಿತ್ಸೆ ನೀಡಿ ನಂತರ ಅವರನ್ನು ಮನೆಗೆ ಕಳುಹಿಸಲಾಗಿದೆ.