ಹಿಜಾಬ್-ಕೇಸರಿ ವಿವಾದ ರಾಜ್ಯದಲ್ಲಿ ತೀವ್ರಗೊಂಡಿದೆ. ಉಡುಪಿ ಜಿಲ್ಲೆಯಲ್ಲಿ ಅರಂಭವಾದ ವಿವಾದ ಇದೀಗ ರಾಜ್ಯಾದ್ಯಂತ ವಿಸ್ತಾರಗೊಂಡಿದೆ. ಈ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಬೆಂಗಳೂರು ನಗರ ಪೊಲೀಸ್ ಕಮೀಷನರ್ ಶಾಲಾ ಹಾಗೂ ಕಾಲೇಜುಗಳ ಬಳಿ 144 ಸೆಕ್ಷನ್ ಜಾರಿ ಮಾಡಿ ಅದೇಶ ಮಾಡಿದ್ದಾರೆ.
ಬೆಂಗಳೂರಿನ ಶಾಲಾ-ಕಾಲೇಜುಗಳ ಸುತ್ತ 200 ಮೀ. ಸುತ್ತಳತೆಯಲ್ಲಿ ಇಂದು ಫೆ.9 ರಿಂದ ಫೆ.22 ರ ವರೆಗೆ 144 ಸೆಕ್ಷನ್ ಅನ್ವಯ ನಿಷೇಧಾಜ್ಞೆ ಜಾರಿ ಮಾಡಿ ನಗರ ಕಮೀಷನರ್ ಕಮಲ್ ಪಂತ್ ಆದೇಶ ಮಾಡಿದ್ದಾರೆ.
ಈ ನಿಷೇಧಾಜ್ಞೆಯನ್ವಯ ಶಾಲಾ-ಕಾಲೇಜುಗಳ ಬಳಿ ಗುಂಪು ಕಟ್ಟಿ ಓಡಾಡುವಂತಿಲ್ಲ. ಹೋರಾಟ,ಧರಣಿ,ಪ್ರತಿಭಟನೆ ಮಾಡುವಂತಿಲ್ಲ.
ಸರ್ಕಾರ ಈಗಾಗಲೇ ಹಿಜಾಬ್ ವಿವಾದ ತಣ್ಣಗಾಗಿಸಲು 3 ದಿನಗಳ ರಜೆ ಘೋಷಣೆ ಮಾಡಿದೆ. ಇನ್ನು, ಹೈಕೋರ್ಟ್ ನ ಏಕ ಸದಸ್ಯ ಪೀಠ ಹಿಜಾಬ್ ವಿವಾದದ ಬಗ್ಗೆ ಸತತ 2 ದಿನಗಳ ಕಾಲ ವಾದ ಆಲಿಸಿ, ಈ ಅರ್ಜಿಯನ್ನು ವಿಸ್ತೃತ ಪೀಠಕ್ಕೆ ವಾರ್ಗಾವಣೆ ಮಾಡಿದೆ. ಪೀಠ ಮಧ್ಯಂತರ ತೀರ್ಪು ನೀಡಿಲ್ಲ. ಸರ್ಕಾರದ ಅದೇಶವೇ ಮುಂದಿನ ತೀರ್ಪಿನ ವರೆಗೂ ಅನ್ವಯವಾಗಲಿದೆ ಎಂದು ಹೇಳಿದೆ. ಮುಂದಿನ ವಾರ ಈ ಅರ್ಜಿ ವಿಸ್ತೃತ ಪೀಠದ ಮುಂದೆ ಬರುವ ಸಾಧ್ಯತೆಯಿದೆ.