ಶೇಕಡಾ 50ರಷ್ಟು 2 ಸಾವಿರ ರೂಪಾಯಿ ನೋಟು ವಾಪಸ್​..!

ಆರ್​ಬಿಐ ವಾಪಸ್​ ಪಡೆದಿರುವ 2 ಸಾವಿರ ರೂಪಾಯಿ ನೋಟುಗಳ ಪೈಕಿ ಶೇಕಡಾ 50ರಷ್ಟು ನೋಟು ಬ್ಯಾಂಕ್​ಗೆ ವಾಪಸ್​ ಆಗಿದೆ ಎಂದು ಆರ್​ಬಿಐ ಗವರ್ನರ್​ ಶಕ್ತಿಕಾಂತ್​ ದಾಸ್​ ಹೇಳಿದ್ದಾರೆ.

ಈ ವರ್ಷದ ಮಾರ್ಚ್​ 31ರ ಪ್ರಕಾರ 2 ಸಾವಿರ ರೂಪಾಯಿ ಮುಖಬೆಲೆಯೆ 3 ಲಕ್ಷದ 62 ಸಾವಿರ ಕೋಟಿ ರೂಪಾಯಿ ಮೊತ್ತದ ನೋಟು ಚಲಾವಣೆಯಲ್ಲಿತ್ತು. ನೋಟು ವಾಪಸ್​ ಪಡೆಯುವ ಘೋಷಣೆಯ ಬಳಿಕ ಅವುಗಳಲ್ಲಿ 1 ಲಕ್ಷದ 80 ಸಾವಿರ ಕೋಟಿ ರೂಪಾಯಿಯಷ್ಟು ಮೊತ್ತದ 2 ಸಾವಿರ ರೂಪಾಯಿ ನೋಟು ವಾಪಸ್​ ಬಂದಿದೆ

ಎಂದು ದಾಸ್​ ಅವರು ಹೇಳಿದ್ದಾರೆ.

ವಾಪಸ್​ ಆಗಿರುವ ನೋಟುಗಳಲ್ಲಿ ಶೇಕಡಾ 80ರಷ್ಟು ನೋಟು ಬ್ಯಾಂಕ್​​ಗಳಲ್ಲಿ ಠೇವಣಿ ರೂಪದಲ್ಲಿ ವಾಪಸ್​ ಆಗಿದೆ. ಉಳಿದ ಶೇಕಡಾ 20ರಷ್ಟು ನೋಟನ್ನು ಬ್ಯಾಂಕ್​ಗಳಲ್ಲಿ ಉಳಿದ ನೋಟುಗಳಿಗೆ ವಿನಿಯಮ ಮಾಡಿಕೊಳ್ಳಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

ಮೇ 19ರಂದು ಆರ್​ಬಿಐ ಎರಡು ಸಾವಿರ ರೂಪಾಯಿ ಮುಖಬೆಲೆಯ ನೋಟುಗಳನ್ನು ಮಾರುಕಟ್ಟೆಯಿಂದ ವಾಪಸ್​ ಪಡೆಯುವ ನಿರ್ಧಾರವನ್ನು ಘೋಷಿಸಿತು.

ಸ್ವಚ್ಛ ನೋಟು ನೀತಿಯಡಿಯಲ್ಲಿ 2016ರಲ್ಲಿ ನೋಟು ನಿಷೇಧದ ವೇಳೆ ಪರಿಚಯಿಸಲಾಗಿದ್ದ 2 ಸಾವಿರ ರೂಪಾಯಿ ನೋಟನ್ನು ವಾಪಸ್​ ಪಡೆಯುವ ನಿರ್ಧಾರ ಕೈಗೊಳ್ಳಲಾಗಿದೆ. 2 ಸಾವಿರ ನೋಟಿನ ಬಾಳಿಕೆ ಅವಧಿ ಐದಾರು ವರ್ಷ ಆಗಿರುವ ಕಾರಣ ನೋಟು ವಾಪಸ್​ ಪಡೆಯಲಾಗಿದೆ.