ಹೊಸಪೇಟೆಯಲ್ಲಿನ ತುಂಗಭದ್ರಾ ಡ್ಯಾಂಗೆ ಒಂದೇ ದಿನ ದಾಖಲೆ ಮಟ್ಟದಲ್ಲಿ 6 ಟಿಎಂಸಿ ನೀರು ಹರಿದು ಬಂದಿದೆ.
ಜಲಾನಯನ ಅಚ್ಚುಕಟ್ಟು ಪ್ರದೇಶ ಹಾಗೂ ಮಲೆನಾಡಿನಲ್ಲಿ ಮಳೆಯ ಪ್ರಮಾಣ ಹೆಚ್ಚಾಗಿದ್ದರಿಂದ ನೀರಿನ ಹರಿವಿನ ಮಟ್ಟ ಹೆಚ್ಚುತ್ತಲೇ ಇದೆ. ಇದೇ ರೀತಿ, ನೀರು ಹರಿದು ಬಂದರೆ ಡ್ಯಾಂನಲ್ಲಿನ ನೀರಿನ ಸಂಗ್ರಹ ಮತ್ತಷ್ಟು ಹೆಚ್ಚಳವಾಗಲಿದೆ.
105.78 ಟಿಎಂಸಿ ಸಾಮರ್ಥ್ಯದ ತುಂಗಭದ್ರಾ ಆಣೆಕಟ್ಟೆಯಲ್ಲಿ ಪ್ರಸ್ತುತ 58.21 ಟಿಎಂಸಿ ನೀರು ಸಂಗ್ರಹವಾಗಿವೆ. ಬುಧವಾರ ಈ ಸಂಗ್ರಹ 52.98 ರಷ್ಟಿತ್ತು. ಗುರುವಾರ ಒಂದೇ ದಿನ 60941 ಕ್ಯೂಸೆಕ್ಸ್ ನೀರು ಹರಿದು ಬಂದಿದೆ. ಮುಂದಿನ 3 ರಿಂದ 4 ದಿನಗಳ ಕಾಲ ದಿನೇ ಪ್ರಮಾಣದ ನೀರು ಹರಿದು ಬರಬಹುದು ಎಂದು ತುಂಗಭದ್ರ ಜಾಲಾಶಯದ ಆಡಳಿತ ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಇದೇ ಪ್ರಮಾಣದ ನೀರು ಹರಿದು ಬಂದರೆ ಶೀಘ್ರವೇ ತುಂಗಭದ್ರ ಡ್ಯಾಂ ಪೂರ್ಣ ಭರ್ತಿಯಾಗಲಿದೆ.
ಕಳೆದ 15 ದಿನಗಳ ಹಿಂದೆ ನಡೆದ ಕಾಡಾ ಸಭೆಯಲ್ಲಿ ಜುಲೈ ಮೊದಲ ವಾರದಿಂದ ಡ್ಯಾಂನಿಂದ ಕಾಲುವೆಗಳಿಗೆ ನೀರು ಹರಿಸಲಾಗುವುದು ಎಂದು ನಿರ್ಧರಿಸಿ ಪ್ರಕಟಣೆ ಹೊರಡಿಸಲಾಗಿತ್ತು.
2008 ರ ಸಮೀಕ್ಷೆಯಲ್ಲಿ ತುಂಗಭದ್ರಾ ಆಣೆಕಟ್ಟೆಯ ಸಂಗ್ರಹ ಸಾಮರ್ಥ್ಯ 100 ಟಿಎಂಸಿ ಆಗಿತ್ತು. 2016 ರಲ್ಲಿ ನಡೆದ ಸಮೀಕ್ಷೆಯಲ್ಲಿ ಡ್ಯಾಂನ ಸಾಮರ್ಥ್ಯ 5 ಟಿಎಂಸಿ ಹೆಚ್ಚಾಗಿದೆ. ತೆಲಂಗಾಣ, ಆಂಧ್ರಪ್ರದೇಶ ಹಾಗೂ ಕರ್ನಾಟಕ ಮೂರೂ ರಾಜ್ಯಗಳು ಈ ಸಮೀಕ್ಷೆಯನ್ನು ಒಪ್ಪಿಕೊಂಡಿವೆ. ಆ ಮೂಲಕ ಇದೀಗ, ಡ್ಯಾಂನ ಸಾಮರ್ಥ್ಯ 105.78 ಟಿಎಂಸಿಗೆ ಏರಿಕೆಯಾಗಿದೆ.