ಹೊಸ ಸಂಸತ್​ ಭವನ ಉದ್ಘಾಟನೆ – ಮೋದಿ ಸರ್ಕಾರದಿಂದ ರಾಷ್ಟ್ರಪತಿಗೆ ಅವಮಾನ – 19 ವಿಪಕ್ಷಗಳಿಂದ ಬಹಿಷ್ಕಾರ

ಮೇ 28ರಂದು ನಿಗದಿಯಾಗಿರುವ ಹೊಸ ಸಂಸತ್​ ಭವನದ ಉದ್ಘಾಟನೆಯನ್ನು 19 ವಿರೋಧ ಪಕ್ಷಗಳು ಬಹಿಷ್ಕರಿಸಿವೆ.

ಇದೇ ಭಾನುವಾರ ಪ್ರಧಾನಿ ನರೇಂದ್ರ ಮೋದಿ ಅವರು ಹೊಸ ಸಂಸತ್​ ಭವನವನ್ನು ಉದ್ಘಾಟಿಸಲಿದ್ದಾರೆ. ಆದರೆ ಉದ್ಘಾಟನಾ ಕಾರ್ಯಕ್ರಮಕ್ಕೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಆಹ್ವಾನಿಸಿಲ್ಲ.

ಸಂಸತ್​ ಭವನವನ್ನು ರಾಷ್ಟ್ರಪತಿಗಳು ಉದ್ಘಾಟನೆ ಮಾಡಬೇಕಿತ್ತು, ಪ್ರಧಾನಮಂತ್ರಿಗಳಲ್ಲ. ರಾಷ್ಟ್ರಪತಿಗಳಿಗೆ ಉದ್ಘಾಟನೆಗೆ ಅವಕಾಶ ನೀಡದೇ ಇರುವುದು ರಾಷ್ಟ್ರಪತಿ ಹುದ್ದೆಗೆ ಮಾಡಿದ ಅವಮಾನ ಮತ್ತು ಸಂವಿಧಾನದ ಉಲ್ಲಂಘನೆ ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.

ಸಂವಿಧಾನದ 71ನೇ ವಿಧಿ ಪ್ರಕಾರ ರಾಷ್ಟ್ರಪತಿಗಳು ಭಾರತದ ಮುಖ್ಯಸ್ಥರು ಮಾತ್ರವಲ್ಲದೇ ಸಂಸತ್ತಿನ ಅವಿಭಾಜ್ಯ ಅಂಗ. ಸಂಸತ್ತಿನ ಅಧಿವೇಶವನ್ನು ಕರೆಯುವುದು, ವರ್ಷದಲ್ಲಿ ಸಂಸತ್ತಿನ ಮೊದಲ ಅಧಿವೇಶನದ ಮೊದಲ ದಿನ ಉದ್ದೇಶಿಸಿ ಮಾತಾಡುವುದು ಕೂಡಾ ರಾಷ್ಟ್ರಪತಿಗಳೇ. ಸಂಸತ್ತಿನಲ್ಲಿ ಅಂಗೀಕಾರಗೊಂಡ ಮಸೂದೆಗಳು ಕಾಯ್ದೆಗಳಾಗಿ ಜಾರಿ ಆಗಲು ಸಹಿ ಹಾಕುವುದು ಕೂಡಾ ರಾಷ್ಟ್ರಪತಿಗಳೇ. ರಾಷ್ಟ್ರಪತಿಗಳಿಲ್ಲದೇ ಸಂಸತ್ತು ಕಾರ್ಯ ನಿರ್ವಹಿಸಲು ಸಾಧ್ಯವಿಲ್ಲ. ಹೀಗಿದ್ದಾಗ್ಯೂ ರಾಷ್ಟ್ರಪತಿಗಳಿಲ್ಲದೇ ಪ್ರಧಾನಮಂತ್ರಿಯವರೇ ಉದ್ಘಾಟನೆಗೆ ನಿರ್ಧರಿಸಿರುವುದು ರಾಷ್ಟ್ರಪತಿಗೆ ಮಾಡಲಾದ ಅವಮಾನ 

ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.

ಸಂಸತ್ತು ಭವನದ ಉದ್ಘಾಟನಾ ಕಾರ್ಯಕ್ರಮವನ್ನು ಬಹಿಷ್ಕರಿಸಿರುವ ವಿರೋಧ ಪಕ್ಷಗಳು:

1. ಕಾಂಗ್ರೆಸ್​ 2. ಡಿಎಂಕೆ 3. ಆಮ್​ ಆದ್ಮಿ ಪಾರ್ಟಿ 4. ಶಿವಸೇನೆ (ಉದ್ಧವ್​ ಠಾಕ್ರೆ ಬಣ) 5. ಸಮಾಜವಾದಿ ಪಕ್ಷ 6. ಸಿಪಿಐ 7. ಜಾರ್ಖಂಡ್​ ಮುಕ್ತಿ ಮೋರ್ಚಾ 8. ಕೇರಳ ಕಾಂಗ್ರೆಸ್ (ಮಣಿ) 9. ವಿಸಿಕೆ 10. ರಾಷ್ಟ್ರೀಯ ಲೋಕದಳ 11. ತೃಣಮೂಲ ಕಾಂಗ್ರೆಸ್​ 12. ಜೆಡಿಯು 13. ಎನ್​ಸಿಪಿ 14. ಸಿಪಿಐಎಂ 15. ರಾಷ್ಟ್ರೀಯ ಜನತಾ ದಳ 16. ಇಂಡಿಯನ್​ ಯೂನಿಯನ್​ ಮುಸ್ಲಿಂ ಲೀಗ್​ 17. ನ್ಯಾಷನಲ್​ ಕಾನ್ಫೆರೆನ್ಸ್ 18. ರೆವ್ಯೂಲಷನರಿ ಸೋಷಿಯಲಿಸ್ಟ್​ ಪಕ್ಷ 19. ಎಂಡಿಎಂಕೆ