ಅರಬ್ಬಿ ಸಮುದ್ರದಲ್ಲಿ Biparjoy ಚಂಡಮಾರುತ – ಸಂಜೆ ವೇಳೆ ಬಿರುಗಾಳಿ ಮಳೆ

ಅರಬ್ಬಿ ಸಮುದ್ರದ ಗೋವಾ ಭಾಗದಲ್ಲಿ ರೂಪುಗೊಂಡಿರುವ ಬಿಪರ್​ಜಾಯ್​ ಹೆಸರಿನ ಚಂಡಮಾರುತ ಇವತ್ತು ಸಂಜೆ ವೇಳೆಗೆ ತೀವ್ರತೆಯನ್ನು ಪಡೆದುಕೊಳ್ಳಬಹುದು ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ.

ಗಂಟೆಗೆ 80ರಿಂದ 90 ಕಿಲೋ ಮೀಟರ್​ ವೇಗದಲ್ಲಿ ಬಿರುಗಾಳಿ ಬೀಸುತ್ತಿದ್ದು, ಇವತ್ತು ಸಂಜೆ ವೇಳೆಗೆ ಬಿರುಗಾಳಿ ವೇಗ ಗಂಟೆಗೆ 105ರಿಂದ 125 ಕಿಲೋ ಮೀಟರ್​ ವೇಗ ಇರಬಹುದು ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ.

ಈ ಚಂಡಮಾರುತದ ಕಾರಣದಿಂದ ಕರ್ನಾಟಕದ ಕರಾವಳಿ ಭಾಗ, ಉತ್ತರ ಕೇರಳ ಮತ್ತು ಗೋವಾ ಕರಾವಳಿಯಲ್ಲಿ ಬಿರುಗಾಳಿ ಸಹಿತ ಭಾರೀ ಮಳೆಯಾಗುವ ಎಚ್ಚರಿಕೆ ನೀಡಲಾಗಿದೆ.

ಮುಂಗಾರು ವಿಳಂಬ:

ಈ ಚಂಡಮಾರುತದ ಕಾರಣದಿಂದಾಗಿ ದೇಶದಲ್ಲಿ ಮುಂಗಾರು ಆರಂಭ ವಿಳಂಬವಾಗಿದೆ. ಕೇರಳದಲ್ಲಿ ಮುಂಗಾರು ಪ್ರವೇಶ 1 ವಾರ ವಿಳಂಬವಾಗಿದೆ. ಜೂನ್​ 8 ಅಥವಾ 9ರಂದು ಮುಂಗಾರು ಪ್ರವೇಶ ಆಗಬಹುದು ಎಂದು ಅಂದಾಜಿಸಲಾಗಿದೆ. ಜೊತೆಗೆ ಮುಂಗಾರು ಪ್ರವೇಶದ ತೀವ್ರತೆಯೂ ಕಡಿಮೆ ಇರಲಿದೆ ಎಂದು ಹವಾಮಾನ ತಜ್ಞರು ಹೇಳಿದ್ದಾರೆ.

ಬಿಪರ್​ಜಾಯ್​ ಎಂದರೆ ಏನರ್ಥ..?

ಈ ಚಂಡಮಾರುತಕ್ಕೆ ಹೆಸರು ಕೊಟ್ಟಿದ್ದು ಬಾಂಗ್ಲಾದೇಶ. ಬಿಪರ್​ಜಾಯ್​ ಎಂದರೆ ವಿನಾಶ ಅಥವಾ ಅನಾಹುತ ಎಂದರ್ಥ.