KMF Milk: ಇಂದಿನಿಂದ ನಂದಿನಿ ಹಾಲಿನ ಬೆಲೆ ಹೆಚ್ಚಳ – ನಂದಿನಿ ಹಾಲು ದೇಶದಲ್ಲೇ ಅಗ್ಗ- ರೈತರಿಗೆ ಪ್ರೋತ್ಸಾಹಧನವೂ ಏರಿಕೆ

ಇಂದಿನಿಂದ ರಾಜ್ಯದಲ್ಲಿ ನಂದಿನಿ ಹಾಲಿನ ದರ ಏರಿಕೆ ಆಗಿದೆ. ಪ್ರತಿ ಲೀಟರ್​​ಗೆ ಕರ್ನಾಟಕ ಹಾಲು ಒಕ್ಕೂಟ 3 ರೂಪಾಯಿ ಹೆಚ್ಚಳ ಮಾಡಿದೆ.

ನಂದಿನಿ ಟೋನ್ಡ್​ ಹಾಲು (ನೀಲಿ ಪೊಟ್ಟಣ)ದ ದರ 39 ರೂಪಾಯಿಗಳಿಂದ 42 ರೂಪಾಯಿಗೆ ಹೆಚ್ಚಳವಾಗಿದೆ.

ನಂದಿನಿ ಹೋಮೋಜಿನೈಸ್ಡ್ ಹಸುವಿನ ಶುದ್ಧ ಹಾಲು (ಹಸಿರು ಪೊಟ್ಟಣ) ದರ ಲೀಟರ್​ಗೆ 43 ರೂಪಾಯಿಗಳಿಂದ 46 ರೂಪಾಯಿಗೆ ಏರಿಕೆ ಆಗಿದೆ.

ಶುಭಂ (ಕೇಸರಿ ಪೊಟ್ಟಣ) ಹಾಲು 45 ರೂಪಾಯಿಗಳಿಂದ 48 ರೂಪಾಯಿಗೆ ಏರಿಕೆ ಆಗಿದೆ.

ಮೊಸರು ಪ್ರತಿ ಲೀಟರ್​ಗೆ 47 ರೂಪಾಯಿ ರೂಪಾಯಿಗಳಿಂದ 50 ರೂಪಾಯಿಗೆ ಹೆಚ್ಚಳವಾಗಿದೆ.

ಮಜ್ಜಿಗೆ 200 ಮಿಲಿ ಲೀಟರ್​ ಪೊಟ್ಟಣದ ದರ 8 ರೂಪಾಯಿಯಿಂದ 9 ರೂಪಾಯಿಗೆ ಹೆಚ್ಚಳವಾಗಿದೆ.

ರೈತರಿಗೆ ಸಹಾಯಧನ ಹೆಚ್ಚಳ:

ಗ್ರಾಹಕರಿಗೆ ತಾನು ಹೆಚ್ಚಳ ಮಾಡಿರುವ ಹಾಲಿನ ಬೆಲೆಯ ಮೊತ್ತವನ್ನು ಕರ್ನಾಟಕ ಹಾಲು ಒಕ್ಕೂಟ ರೈತರಿಗೆ ವರ್ಗಾಯಿಸಲಿದೆ. ಹಾಲು ಒಕ್ಕೂಟಕ್ಕೆ ರೈತರು ಮಾರುವ ಹಾಲಿಗೆ ಪ್ರತಿ ಲೀಟರ್​​ಗೆ ಸಹಾಯಧನವನ್ನು 3 ರೂಪಾಯಿಯಷ್ಟು ಹೆಚ್ಚಳ ಮಾಡಲು ತೀರ್ಮಾನಿಸಲಾಗಿದೆ.

ಹಾಲಿಗೆ ಪ್ರತಿ ಲೀಟರ್​ಗೆ ರೈತರಿಗೆ ಸಿಗುತ್ತಿದ್ದ 5 ರೂಪಾಯಿ ಪ್ರೋತ್ಸಾಹಧನ 8 ರೂಪಾಯಿಗೆ ಏರಿಕೆ ಆಗಿದೆ.

ಪಶು ಆಹಾರದ ಬೆಲೆ ಹೆಚ್ಚಳದಿಂದಾಗಿ ರಾಜ್ಯದಲ್ಲಿ ಈಗಾಗಲೇ 35 ಸಾವಿರ ಕುಟುಂಬಗಳು ಹೈನುಗಾರಿಕೆಯಿಂದ ದೂರ ಹೋಗಿವೆ. ಇದರಿಂದ ಪ್ರತಿ ತಿಂಗಳು 10 ಲಕ್ಷ ಲೀಟರ್​ನ್ನಷ್ಟು ಹಾಲಿನ ಉತ್ಪಾದನೆಯೂ ಕಡಿಮೆ ಆಗಿದೆ.

ಉಳಿದ ಹಾಲಿಗಿಂತ ಅಗ್ಗ:

ಮೂರು ರೂಪಾಯಿ ಬೆಲೆ ಹೆಚ್ಚಳದ ಹೊರತಾಗಿಯೂ ನಂದಿನಿ ಹಾಲು ಉಳಿದ ಹಾಲಿಗಿಂತ ಅತ್ಯಂತ ಕಡಿಮೆ ಮತ್ತು ಅಗ್ಗ.

ಗುಜರಾತ್​ ಮೂಲದ ಅಮುಲ್​ ಹಾಲಿನ ಬೆಲೆ ಲೀಟರ್​ಗೆ 54 ರೂಪಾಯಿ. ಅಂದರೆ ನಂದಿನಿಗಿಂತ 12 ರೂಪಾಯಿ ದುಬಾರಿ.

ಕೇರಳದ ಮಿಲ್ಮಾ ಹಾಲಿನ ದರ ಲೀಟರ್​ಗೆ 50 ರೂಪಾಯಿ. ನಂದಿನಿಗಿಂತ ಲೀಟರ್​ಗೆ 8 ರೂಪಾಯಿ ದುಬಾರಿ.

ದೆಹಲಿಯಲ್ಲಿ ಹಾಲಿನ ದರ ಲೀಟರ್​ಗೆ 54 ರೂಪಾಯಿ, ಮಹಾರಾಷ್ಟ್ರದಲ್ಲಿ 54 ಮತ್ತು ಆಂಧ್ರಪ್ರದೇಶದಲ್ಲಿ 56 ರೂಪಾಯಿ.