ರೌಡಿ ಶೀಟರ್​ ಪುನೀತ್​ ಕೆರೆಹಳ್ಳಿ ಪರ ಉಪವಾಸ ಸತ್ಯಾಗ್ರಹಕ್ಕೆ ಸಿದ್ಧ – BJP ಶಾಸಕ ಹರೀಶ್​ ಪೂಂಜಾ ಎಚ್ಚರಿಕೆ

ಹಲವು ಅಪರಾಧ ಪ್ರಕರಣಗಳಲ್ಲಿ ಆರೋಪಿಯಾಗಿರುವ ರೌಡಿಶೀಟರ್​ ಪುನೀತ್​ ಕೆರೆಹಳ್ಳಿ ವಿರುದ್ಧ ದಾಖಲು ಮಾಡಲಾಗಿರುವ ರೌಡಿಪಟ್ಟಿಯನ್ನು ತೆಗೆದುಹಾಕುವಂತೆ ಆಗ್ರಹಿಸಿರುವ ಬೆಳ್ತಂಗಡಿ ಬಿಜೆಪಿ ಶಾಸಕ ಹರೀಶ್​ ಪೂಂಜಾ ಅವರು, ಪುನೀತ್​ ಕೆರೆಹಳ್ಳಿಗಾಗಿ ಉಪವಾಸ ಸತ್ಯಾಗ್ರಹ ಮಾಡುವ ಎಚ್ಚರಿಕೆ ನೀಡಿದ್ದಾರೆ.

ಪೊಲೀಸ್​ ಮಹಾನಿರ್ದೇಶಕ ಅಲೋಕ್​ ಮೋಹನ್​ ಅವರನ್ನು ಭೇಟಿಯಾಗಿ ಎರಡು ಪುಟಗಳ ಆಗ್ರಹ ಪತ್ರ ನೀಡಿರುವ ಶಾಸಕ ಪೂಂಜಾ ಅವರು, ಪುನೀತ್​ ಕೆರೆಹಳ್ಳಿಯವರಿಗೆ ಏನೇ ತೊಂದರೆ ಆದರೂ ಸರ್ಕಾರವೇ ನೇರ ಹೊಣೆ ಮತ್ತು ಅವರಿಗೆ ಯಾವುದೇ ಸಮಸ್ಯೆಯಾದರೂ ರಾಜ್ಯದ ಎಲ್ಲ ಹಿಂದೂ ಕಾರ್ಯಕರ್ತರು ಸರ್ಕಾರದ ವಿರುದ್ಧ ಉಪವಾಸ ಸತ್ಯಾಗ್ರಹ ಮಾಡಲು ಸಿದ್ಧರಿದ್ದಾರೆ ಎಂದು ಎಚ್ಚರಿಸಿದ್ದಾರೆ.

ಹಲವು ಅಪರಾಧ ಪ್ರಕರಣಗಳಲ್ಲಿ ಆರೋಪಿಯಾಗಿರುವ ಆಗಸ್ಟ್​ 17ರಂದು ಸರ್ಕಾರ ಗೂಂಡಾ ಕಾಯ್ದೆಯಡಿ ರೌಡಿಪಟ್ಟಿ ತೆರೆದಿದೆ.

ಅಕ್ಟೋಬರ್​ 2ರಂದು ಗಾಂಧಿ ಜಯಂತಿಯಂದು ತಮ್ಮ ವಿರುದ್ಧದ ರೌಡಿಪಟ್ಟಿ ಕೈಬಿಡುವಂತೆ ಆಗ್ರಹಿಸಿ ಪುನೀತ್​ ಕೆರೆಹಳ್ಳಿ ಬೆಂಗಳೂರಿನಲ್ಲಿ ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದರು. ಆ ಬಳಿಕ ಪೊಲೀಸರು ಕೆರೆಹಳ್ಳಿಯನ್ನು ಆಸ್ಪತ್ರೆಗೆ ದಾಖಲಿಸಿದ್ದರು.