ಪಾಪಕರ್ಮ ಸುಡುತ್ತದೆ, ರಾವಣನಾದರೆ ಅಂತ್ಯ – ಕೊಲೆ ಆರೋಪಿ ನಟ ದರ್ಶನ್​​ಗೆ ನಟ ಜಗ್ಗೇಶ್​ ಮಾತಿನೇಟು

ಅಭಿಮಾನಿಯ ಕೊಲೆ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿರುವ ನಟ ದರ್ಶನ್​ ಅವರಿಗೆ ನವರಸ ನಾಯಕ ಮತ್ತು ರಾಜ್ಯಸಭಾ ಸಂಸದ ಜಗ್ಗೇಶ್​ ಅವರು ಪರೋಕ್ಷವಾಗಿಯೇ ತಿವಿದಿದ್ದಾರೆ.

ಕರ್ಮ ಹಿಂಬಾಲಿಸುತ್ತದೆ ಮತ್ತು ಪಾಪ ಕರ್ಮ ಸುಡುತ್ತದೆ ಎಂದಿರುವ ನಟ ಜಗ್ಗೇಶ್​ ಅವರು ಮದಕ್ಕೆ ಕಾರಣ್ಯದ ಅರಿವಿಲ್ಲ ಮತ್ತು ರಾವಣನಾದರೆ ಅಂತ್ಯ ಎಂದು ಸನಾತನ ಧರ್ಮ ಹೇಳಿದೆ ಎಂದು ಮೊಟಕಿದ್ದಾರೆ.

ಸರ್ವಆತ್ಮಾನೇನಬ್ರಹ್ಮ
ಸರ್ವ ಜೀವಿಯಲ್ಲಿ ದೇವರಿದ್ದಾನೆ
ಯಾರನ್ನು ಕೊಲ್ಲುವ ಹಕ್ಕು ಜೀವನಿಗಿಲ್ಲಾ!
ಕರ್ಮ ಜೀವನನ ಹಿಂದೆ ಹಿಂಬಾಲಿಸುತ್ತದೆ
ಅವನ ಪಾಪಕರ್ಮ ಅವನ ಸುಡುತ್ತದೆ!
ಕಲಿಯುಗದಲ್ಲಿ ದೇವರು ಕಲ್ಲಲ್ಲಾ
ಎಲ್ಲಾ ಕರ್ಮಕ್ಕು ತತಕ್ಷಣ ಪಲಿತಾಂಶ
ಉಂಟು!
ರಾಮನಾಗು ರಾವಣನಾದರೆ ಅಂತ್ಯ ಎಂದಿದೆ ಸನಾತನ ಕೃತಿ!
ಮದಕ್ಕೆ ಕಾರುಣ್ಯದ ಅರಿವಿಲ್ಲಾ!

ಎಂದು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ನಟ ಜಗ್ಗೇಶ್​ ಅವರು ಬರೆದುಕೊಂಡಿದ್ದಾರೆ.

2021ರ ಫೆಬ್ರವರಿಯಲ್ಲಿ ನಟ ದರ್ಶನ್​ ಅವರ ಬಗ್ಗೆ ಜಗ್ಗೇಶ್​ ಅವರು ಮಾತಾಡಿದ್ದಾರೆ ಎನ್ನಲಾಗಿದ್ದ ಆಡಿಯೋವೊಂದು ಸೋರಿಕೆ ಆಗಿತ್ತು.

ಆ ಆಡಿಯೋದಲ್ಲಿ ದರ್ಶನ್​ ಅವರ ಬಗ್ಗೆ ಕೆಟ್ಟದಾಗಿ ಜಗ್ಗೇಶ್​ ಮಾತಾಡಿದ್ದಾರೆ ಎಂದು ಮೈಸೂರಿನಲ್ಲಿ ನಡೆಯುತ್ತಿದ್ದ ತೋತಾಪುರಿ ಚಿತ್ರೀಕರಣ ಸ್ಥಳಕ್ಕೆ ಹೋಗಿ ದರ್ಶನ್​ ಅಭಿಮಾನಿಗಳು ನಟ ಜಗ್ಗೇಶ್​ ಅವರ ಜೊತೆಗೆ ಗಲಾಟೆ ಮಾಡಿದ್ದರು. ಆ ಬಳಿಕ ನಟ ಜಗ್ಗೇಶ್​ ಅವರು ದರ್ಶನ್​ ಅಭಿಮಾನಿಗಳಿಗೆ ಬಹಿರಂಗವಾಗಿ ಕ್ಷಮೆಯಾಚಿಸಿದ್ದರು.