Annabhagya: ಅನ್ನಭಾಗ್ಯ ನೇರ ನಗದು ಯೋಜನೆಗೆ ಇವತ್ತು ಚಾಲನೆ

ಚಿತ್ರ: 2013ರಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿ ಆದ ಬೆನ್ನಲ್ಲೇ ಅನ್ನಭಾಗ್ಯ ಯೋಜನೆಗೆ ಚಾಲನೆ ನೀಡಿದ್ದ ಸಿಎಂ ಸಿದ್ದರಾಮಯ್ಯ

ಸಿಎಂ ಸಿದ್ದರಾಮಯ್ಯ (CM Siddaramaiah) ನೇತೃತ್ವದ ಕಾಂಗ್ರೆಸ್​ ಸರ್ಕಾರದ ಅತ್ಯಂತ ಜನಪ್ರಿಯ ಅನ್ನಭಾಗ್ಯ (Annabhagya) ಕಾರ್ಯಕ್ರಮ ಇವತ್ತಿನಿಂದ ಹೊಸತನದೊಂದಿಗೆ ರಾಜ್ಯದಲ್ಲಿ ಮತ್ತೆ ಜಾರಿಯಾಗಲಿದೆ.

ಸಂಜೆ 5 ಗಂಟೆಗೆ ವಿಧಾನಸೌಧದಲ್ಲಿ ಸಿಎಂ ಸಿದ್ದರಾಮಯ್ಯ ಅವರು ಅನ್ನಭಾಗ್ಯ ಯೋಜನೆಗೆ ಚಾಲನೆ ನೀಡಲಿದ್ದಾರೆ.

1 ಕೋಟಿ 28 ಲಕ್ಷ  ಕಾರ್ಡ್​ದಾರರಿಗೆ (Ration Card Holders) ನೇರ ನಗದು ಜಮೆಗೆ ಮುಖ್ಯಮಂತ್ರಿಗಳು ಚಾಲನೆ ನೀಡಲಿದ್ದಾರೆ.

ಭಾರತೀಯ ಆಹಾರ ನಿಗಮ (FCI) ಅಕ್ಕಿ ಪೂರೈಕೆಗೆ (Rice) ನಿರಾಕರಿಸಿರುವ ಹಿನ್ನೆಲೆಯಲ್ಲಿ ಒಂದು ಕೆಜಿಗೆ 34 ರೂಪಾಯಿಗೆ ಪ್ರತಿ ಕುಟುಂಬದ ಸದಸ್ಯರ ಆಧಾರದ ಮೇಲೆ ಹೆಚ್ಚುವರಿ ತಲಾ 5 ಕೆಜಿ ಅಕ್ಕಿಯ ಮೊತ್ತವನ್ನು ಕಾರ್ಡ್​ದಾರರ ಖಾತೆಗೆ ಜಮೆ ಮಾಡಲಾಗುತ್ತದೆ.

ಬಿಪಿಎಲ್​ ಕಾರ್ಡ್​ ಹೊಂದಿರುವ ಒಂದು ಕುಟುಂಬದಲ್ಲಿ ಒಬ್ಬನ್ನಷ್ಟೇ ಇದ್ದರೆ ಅವರಿಗೆ ಐದು ಕೆಜಿ ಹೆಚ್ಚುವರಿ ಅಕ್ಕಿ ಬದಲು 170 ರೂಪಾಯಿ ಜಮೆ ಆಗಲಿದೆ. ಒಂದು ವೇಳೆ ಐವರಿದ್ದರೆ ಆಗ ಆ ಕುಟುಂಬಕ್ಕೆ ಪ್ರತಿ ತಿಂಗಳು 850 ರೂಪಾಯಿ ಜಮೆ ಆಗಲಿದೆ.

ನೇರ ನಗದು ಯೋಜನೆ ಮೂಲಕ ಕುಟುಂಬದ ಮುಖ್ಯಸ್ಥರ ಖಾತೆಗೆ ನೇರವಾಗಿ ಹಣ ಜಮೆ (DBT) ಆಗಲಿದೆ. ಈ ತಿಂಗಳ ಮೊತ್ತವನ್ನು ಈ ತಿಂಗಳೊಳಗೆ ಜಮೆ ಮಾಡಲಾಗುತ್ತದೆ. 

ಯೋಜನೆಯ ಜಾರಿಗೆ ವರ್ಷಕ್ಕೆ ಬಜೆಟ್​ನಲ್ಲಿ 10 ಸಾವಿರ ಕೋಟಿ ರೂಪಾಯಿ ಮೀಸಲಿಡಲಾಗಿದೆ.

44 ಲಕ್ಷ 80 ಸಾವಿರ ಅಂತ್ಯೋದಯ ಯೋಜನೆ ಮತ್ತು 3 ಕೋಟಿ 97 ಲಕ್ಷದಷ್ಟು ಆದ್ಯತಾ ಪಡಿತರ ಚೀಟಿದಾರರಿಗೆ ಅಂದರೆ 4 ಕೋಟಿ 41 ಲಕ್ಷದ 80 ಸಾವಿರ ಮಂದಿಗೆ ಅನ್ನಭಾಗ್ಯ ಹೆಚ್ಚುವರಿ ಅಕ್ಕಿ ಯೋಜನೆಯಿಂದ ಲಾಭವಾಗಲಿದೆ.