2009ರಲ್ಲಿ ತೆರೆಕಂಡು ಸಿನಿ ಜಗತ್ತಿನಲ್ಲಿ ಭಾರಿ ಸಂಚಲನ ಮೂಡಿಸಿದ್ದ ಹಾಲಿವುಡ್‌ ಸಿನಿಮಾ ‘ಅವತಾರ್’ ಚಿತ್ರದ ಎರಡನೇ ಭಾಗಕ್ಕೆ ‘ಅವತಾರ್: ದಿ ವೇ ಆಫ್ ವಾಟರ್’ ಎಂದು ಹೆಸರಿಡಲಾಗಿದೆ. ಈ ಚಿತ್ರವನ್ನು 160 ಭಾಷೆಗಳಲ್ಲಿ ಇದೇ ವರ್ಷದ ಡಿಸೆಂಬರ್ 16 ರಂದು ಬಿಡುಗಡೆ ಮಾಡಲಾಗುವುದು ಎಂದು ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್ ತಿಳಿಸಿದ್ದಾರೆ.
ಚಿತ್ರಮಂದಿರಗಳ ಮಾಲೀಕರ ವಾರ್ಷಿಕ ಸಮಾವೇಶ ‘ಸಿನೆಮಾಕಾನ್‌’ನಲ್ಲಿ ಭಾಗವಹಿಸಿ ಮಾತನಾಡಿದ ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್ ಅವರು, 2022 ರ ಡಿಸೆಂಬರ್ 16 ರಂದು ಅವತಾರ್ : ದಿ ವೇ ಆಫ್ ವಾಟರ್ ಚಿತ್ರ ಬಿಡುಗಡೆಯಾಗಲಿದೆ. ಅದಕ್ಕೂ ಮುಂಚೆ ಸೆಪ್ಟಂಬರ್ 23 ರಂದು ಅವತಾರ್ ಚಿತ್ರವನ್ನು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡಲಾಗುವುದು ಎಂದಿದ್ದಾರೆ.
2009 ರಲ್ಲಿ ಬಿಡುಗಡೆಯಾಗಿದ್ದ ಅವತಾರ್ ಚಿತ್ರ ಜಾಗತಿಕವಾಗಿ ಸರ್ವಕಾಲಿಕ ಅತಿ ಹೆಚ್ಚು ಅಂದಾಜು ₹ 21 ಸಾವಿರ ಕೋಟಿ ಗಳಿಕೆ ಕಂಡ ಸಿನಿಮಾ ಎನಿಸಿದೆ. ಮಾತ್ರವಲ್ಲದೆ ₹ 20 ಸಾವಿರ ಕೋಟಿಗಿಂತ ಹೆಚ್ಚು ಗಳಿಕೆ ಕಂಡ ಮೊದಲ ಚಿತ್ರ ಎಂಬ ಹೆಗ್ಗಳಿಕೆಯನ್ನೂ ಹೊಂದಿದೆ.
ನಿರ್ದೇಶಕ ಜೇಮ್ಸ್ ಅವರೊಂದಿಗೆ ಜಾನ್‌ ಲ್ಯಾನ್‌ಡೌ ಬಂಡವಾಳ ಹೂಡಿದ್ದಾರೆ. ಸಿಗೌರ್ನಿ ವೀವರ್‌, ಸ್ಟೇಫನ್‌ ಲ್ಯಾಂಗ್‌, ಕ್ಲಿಫ್‌ ಕರ್ಟೀಸ್‌, ಜೋಲ್‌ ಡೇವಿಡ್‌ ಮೂರ್‌, ಸಿಸಿಎಚ್‌ ಪೌಂಡರ್‌, ಎಡೀ ಫಾಲ್ಕೊ ಮತ್ತಿತರರು ತೆರೆಮೇಲೆ ಕಾಣಿಸಿಕೊಳ್ಳಲಿದ್ದಾರೆ.
ಅವತಾರ್ ಸರಣಿಯ ಒಟ್ಟು ಐದು ಸಿನಿಮಾಗಳು ತಯಾರಾಗಲಿವೆ. ಇದೇ ಮೇ 6 ರಂದು ಈ ಚಿತ್ರದ ಟ್ರೈಲರ್ ಬಿಡುಗಡೆಯಾಗಲಿದೆ.
