ರಾಜಸ್ಥಾನ್ ರಾಯಲ್ಸ್ ಬ್ಯಾಟ್ಸ್ಮನ್ ಶಿಮ್ರಾನ್ ಹೆಟ್ಮೆಯರ್ ಮತ್ತು ಅವರ ಪತ್ನಿಯ ಬಗ್ಗೆ ಹೇಳಿಕೆ ನೀಡಿದ ನಂತರ ಲೆಜೆಂಡರಿ ಸುನಿಲ್ ಗವಾಸ್ಕರ್ ಅನಗತ್ಯವಾಗಿ ವಿವಾದವೊಂದನ್ನು ಮೈ ಮೇಲೆ ಎಳೆದುಕೊಂಡಿದ್ದಾರೆ.
ಶುಕ್ರವಾರ ರಾಜಸ್ಥಾನ ರಾಯಲ್ಸ್ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೆಣಸಿತ್ತು. ಸಿಎಸ್ ಕೆ ವಿರುದ್ಧ 151 ರನ್ ಗಳ ಗುರಿ ಬೆನ್ನಟ್ಟಿದ್ದ ರಾಜಸ್ಥಾನ ರಾಯಲ್ಸ್ ತಂಡ 5 ವಿಕೆಟ್ ಕಳೆದುಕೊಂಡ ನಂತರ ಆರನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಲು ಬಂದ ಹೆಟ್ಮೆಯರ್ ಉದ್ದೇಶಿಸಿ ಗವಾಸ್ಕರ್ ನೀಡಿದ ಹೇಳಿಕೆಗೆ ನೆಟ್ಟಿಗರು ಕೆರಳಿದ್ದಾರೆ.
ಕಾಮೆಂಟರಿ ಬಾಕ್ಸ್‌ನಲ್ಲಿ ಕುಳಿತ ಗವಾಸ್ಕರ್ , ಹೆಟ್ಮೆಯರ್ ಅವರ ಪತ್ನಿ ಡೆಲಿವರಿ ಮಾಡಿದ್ದಾರೆ, ಹೆಟ್ಮೆಯರ್ ಈಗ ರಾಜಸ್ಥಾನ ರಾಯಲ್ಸ್‌ಗೆ ಡೆಲಿವರಿ ಮಾಡುತ್ತಾರೆಯೇ? ಎಂದು ಹೇಳಿದರು. ಈ ಹೇಳಿಕೆ ಇದೀಗ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ. ಸುನೀಲ್ ಗವಾಸ್ಕರ್ ಅವರ ಇಂತಹ ವಿವಾದಾತ್ಮಕ ಹೇಳಿಕೆ ವಿರುದ್ಧ ಟ್ವಿಟಿಗರು ಆಕ್ರೋಶ ಹೊರಹಾಕುತ್ತಿದ್ದಾರೆ.
ಹೆಟ್ಮೆಯರ್ ಅವರ ಪತ್ನಿ ಮೇ 10 ರಂದು ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಮಗು ಜನನದ ನಂತರ ಭಾರತಕ್ಕೆ ಆಗಮಿಸಿದ ಹೆಟ್ಮೆಯರ್ ರಾಜಸ್ಥಾನ ರಾಯಲ್ಸ್ ತಂಡದಲ್ಲಿ ಆಡುತ್ತಿದ್ದಾರೆ.
