ಕಾಂಗ್ರೆಸ್​ನಿಂದ ಬಂದಿದ್ದ 6 ಮಂದಿಗೆ BJP ಉಪ ಚುನಾವಣೆ ಟಿಕೆಟ್​

ಕಾಂಗ್ರೆಸ್​ನಿಂದ ಅನರ್ಹರಾಗಿ ಶಾಸಕ ಸ್ಥಾನ ಕಳೆದುಕೊಂಡಿರುವ 6 ಮಂದಿ ಮಾಜಿ ಶಾಸಕರಿಗೆ ಬಿಜೆಪಿ ಹಿಮಾಚಲಪ್ರದೇಶದಲ್ಲಿ ನಡೆಯಲಿರುವ ಉಪ ಚುನಾವಣೆಯಲ್ಲಿ ಟಿಕೆಟ್​ ನೀಡಿದೆ.

ಅನರ್ಹಗೊಂಡು ಶಾಸಕ ಸ್ಥಾನ ಕಳೆದುಕೊಂಡಿರುವ ಸುಧೀರ್​ ಶರ್ಮಾ, ರವಿ ಥಾಕೂರು, ಇಂದರ್​ ದತ್​ ಲಖನ್​ಪಾಲ್​, ದೇವೇಂದ್ರ ಭುಟ್ಟೋ, ಚೈತನ್ಯ ಶರ್ಮಾ, ರಾಜಿಂದರ್​ ರಾಣಾ ಅವರಿಗೆ ಟಿಕೆಟ್​ ನೀಡಿದೆ.

ಲೋಕಸಭಾ ಚುನಾವಣೆ ಜೊತೆಗೆ ಜೂನ್​ 1ರಂದು ಈ 6 ಕ್ಷೇತ್ರಗಳಿಗೆ ಉಪ ಚುನಾವಣೆ ನಡೆಯಲಿದೆ.

ರಾಜ್ಯಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್​ ಅಧಿಕೃತ ಅಭ್ಯರ್ಥಿಯಾಗಿ ಅಭಿಷೇಕ್​ ಮನು ಸಿಂಘ್ವಿ ಅವರ ಬದಲಿಗೆ ಬಿಜೆಪಿ ಅಭ್ಯರ್ಥಿ ಪರ ಮತ ಹಾಕಿದ್ದರು.

ರಾಜ್ಯಸಭಾ ಮತದಾನದ ಮರು ದಿನ ಹಿಮಾಚಲಪ್ರದೇಶ ವಿಧಾನಸಭೆಯಲ್ಲಿ ಸಿಎಂ ಸುಖ್​ವಿಂದರ್​ ಸಿಂಗ್​ ಸುಕು ಅವರ ನೇತೃತ್ವದ ಕಾಂಗ್ರೆಸ್​ ಸರ್ಕಾರದ ಬಜೆಟ್​​ಗೆ ಅನುಮೋದನೆ ಪಡೆಯುವ ವೇಳೆ ಮತದಾನದಿಂದ ಗೈರಾಗಿದ್ದರು. ಪಕ್ಷದ ವಿಪ್​ ಉಲ್ಲಂಘಿಸಿದ್ದಾಗಿ ಈ ಆರು ಮಂದಿ ಶಾಸಕರನ್ನು ಅನರ್ಹಗೊಳಿಸಲಾಗಿತ್ತು.

ಈ ಮೂಲಕ ಆಪರೇಷನ್​ ಕಮಲದಿಂದ ಸರ್ಕಾರ ಬೀಳುವ ಆತಂಕದಿಂದ ಕಾಂಗ್ರೆಸ್​​ ಬಚಾವ್​ ಆಯ್ತು.

ಅನರ್ಹತೆ ಪ್ರಶ್ನಿಸಿ ಸಲ್ಲಿಸಿರುವ ಅರ್ಜಿಯ ಬಗ್ಗೆ ಸುಪ್ರೀಂಕೋರ್ಟ್​ನಲ್ಲಿ ವಿಚಾರಣೆ ನಡೆಯುತ್ತಿದೆಯಾದರೂ ಅನರ್ಹತೆ ನ್ಯಾಯಾಲಯ ತಡೆ ಕೊಟ್ಟಿಲ್ಲ.

6 ಶಾಸಕರ ಅನರ್ಹತೆಯೊಂದಿಗೆ ಹಿಮಾಚಲಪ್ರದೇಶದಲ್ಲಿ ಕಾಂಗ್ರೆಸ್​ ಸರ್ಕಾರ ಸುರಕ್ಷಿತವಾಗಿದೆ. 68 ಶಾಸಕ ಬಲದ ವಿಧಾನಸಭೆಯ ಈಗಿನ ಬಲಾಬಲ 62ಕ್ಕೆ ಕುಸಿದಿದೆ. ಕಾಂಗ್ರೆಸ್​ ಶಾಸಕರ ಸಂಖ್ಯೆ 34ಕ್ಕೆ ಇಳಿದಿದೆ. ಈಗ ಬಹುಮತಕ್ಕೆ ಬೇಕಿರುವುದು 32. ಬಿಜೆಪಿ 25 ಶಾಸಕರು ಮತ್ತು 3 ಪಕ್ಷೇತರ ಶಾಸಕರ ಬೆಂಬಲವನ್ನು ಹೊಂದಿದೆ.

ಒಂದು ವೇಳೆ ಈ ಆರೂ ಕ್ಷೇತ್ರದಲ್ಲಿ ಬಿಜೆಪಿ ಗೆದ್ದರೆ ಆಗ ಹಿಮಾಚಲಪ್ರದೇಶದಲ್ಲಿ ಕಾಂಗ್ರೆಸ್​ ಸರ್ಕಾರ ಪತನವಾಗಬಹುದು.