ಇಸ್ಲಾಂಗೆ ಬಲವಂತದ ಮತಾಂತರ: CBIನಿಂದ FIR

ಇಸ್ಲಾಂ ಧರ್ಮಕ್ಕೆ ಬಲವಂತವಾಗಿ ಮತಾಂತರ ಮಾಡಲಾದ ಆರೋಪ ಸಂಬಂಧ ಕೇಂದ್ರೀಯ ತನಿಖಾ ದಳ (CBI) ಎಫ್​ಐಆರ್​ ದಾಖಲಿಸಿದೆ.

ಕಲ್ಕತ್ತಾ ಹೈಕೋರ್ಟ್​ ಆದೇಶದ ಮೇರೆ ಸಿಬಿಐ ಎಫ್​ಐಆರ್​ ದಾಖಲಿಸಿದೆ. ಏಳು ಮಂದಿಯನ್ನು ಎಫ್ಐಆರ್​ನಲ್ಲಿ ಆರೋಪಿಗಳೆಂದು ಪರಿಗಣಿಸಲಾಗಿದೆ.

2021ರ ಮೇನಲ್ಲಿ ನಡೆದಿದ್ದ ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯ ಬಳಿಕ ನವೆಂಬರ್​ 24, 2021ರಲ್ಲಿ ಇಬ್ಬರು ವ್ಯಕ್ತಿಗಳು ಕಾಣೆಯಾಗಿದ್ದರು. ಚುನಾವಣೆ ವೇಳೆ ಎದುರಾಳಿ ಪಕ್ಷಕ್ಕೆ ಬೆಂಬಲಿಸಿದರು ಎಂಬ ಕಾರಣಕ್ಕೆ ಅವರಿಬ್ಬರನ್ನು ಬಲವಂತವಾಗಿ ಇಸ್ಲಾಂ ಧರ್ಮಕ್ಕೆ ಮತಾಂತರ ಮಾಡಲಾಗಿದೆ. ಈ ಬಗ್ಗೆ ಪೊಲೀಸರಿಗೆ ದೂರು ನೀಡಿದರೂ ಕ್ರಮಕೈಗೊಂಡಿಲ್ಲ. ಬೆದರಿಕೆ ಅಥವಾ ಮಾದಕ ದ್ರವ್ಯ ಬಳಸಿ ಮತಾಂತರ ಮಾಡಲಾಗಿದೆ ಎಂದು ಆ ಇಬ್ಬರು ವ್ಯಕ್ತಿಗಳ ಪತ್ನಿಯರು ದೂರಿದ್ದರು.

2021ರ ಡಿಸೆಂಬರ್​ನಲ್ಲಿ ದೂರು ನೀಡಿದ್ದರೂ ಪೊಲೀಸರು ಕ್ರಮಕೈಗೊಳ್ಳದ ಹಿನ್ನೆಲೆಯಲ್ಲಿ ಮಾಲ್ಡಾ ಜಿಲ್ಲೆಯ ಪೊಲೀಸ್​ ವರಿಷ್ಠಾಧಿಕಾರಿ ವಿರುದ್ಧವೂ ಸಿಬಿಐ ತನಿಖೆ ಆರಂಭಿಸಿದೆ.

ಖುರ್ಷಿದ್​ ಶೇಖ್​, ನಾಝು ಶೇಖ್​, ಬರ್ಕಟ್ಟಿ ಶೇಖ್​ ಹಬೀಬ್​ ಶೇಖ್​., ರಬಿವುಲ್​ ಶೇಖ್​, ಮುಕ್ತಾದುಲ್​ ಶೇಖ್​, ತಿಂಕು ಶೇಖ್​ ವಿರುದ್ಧ ಸಿಬಿಐ ಪ್ರಕರಣ ದಾಖಲಿಸಿದೆ.