ದೆಹಲಿ ಉಪಮುಖ್ಯಮಂತ್ರಿ ಸಿಸೋಡಿಯಾ ಮನೆ ಮೇಲೆ ಸಿಬಿಐ ದಾಳಿ – ಸ್ವಾಗತ ಕೋರಿದ ಆಮ್​ ಆದ್ಮಿ ಪಕ್ಷ

ದೆಹಲಿಯಲ್ಲಿ ಅಬಕಾರಿ ಪರವಾನಿಗೆ ಸಂಬಂಧ ಸಿಬಿಐ (CBI) ಇವತ್ತು ಬೆಳಗ್ಗೆ ಆಮ್​ ಆದ್ಮಿ ಪಕ್ಷದ (AAM ADMI PARTY) ಸರ್ಕಾರದ ಉಪ ಮುಖ್ಯಮಂತ್ರಿ ಮನೀಶ್​ ಸಿಸೋಡಿಯಾ (Manish Sisodia) ಮನೆ ಮೇಲೆ ದಾಳಿ ನಡೆಸಿದೆ.

ದೆಹಲಿ ಸೇರಿದಂತೆ 20 ಕಡೆಗಳಲ್ಲಿ ಸಿಬಿಐ ದಾಳಿ ಶೋಧ ಕೈಗೊಂಡಿದೆ.

ಕಳೆದ ವರ್ಷ ಸಿಎಂ ಅರವಿಂದ್​ ಕೇಜ್ರಿವಾಲ್ (Arvind Kejriwal)​ ಅವರ ಸರ್ಕಾರ ಹೊಸ ಅಬಕಾರಿ ನೀತಿಯನ್ನು ಜಾರಿಗೊಳಿಸಿತ್ತು.

ಆದರೆ ಹೊಸ ಅಬಕಾರಿ ನೀತಿಯಿಂದ ದೆಹಲಿ ಸರ್ಕಾರದ ಬೊಕ್ಕಸಕ್ಕೆ ನಷ್ಟ ಆಗಿದೆ ಎಂದು ಅಲ್ಲಿನ ಲೆಫ್ಟಿನೆಂಟ್​ ಗವರ್ನರ್​ ಅವರು ಅಭಿಪ್ರಾಯಪಟ್ಟ ಬಳಿಕ ದೆಹಲಿ ಸರ್ಕಾರ ಆ ಅಬಕಾರಿ ನೀತಿಯನ್ನು ಹಿಂಪಡೆದಿತ್ತು.

ಅಬಕಾರಿ ನೀತಿಯಲ್ಲಿನ ಅಕ್ರಮ ಸಂಬಂಧ ಸಿಬಿಐ ಎಫ್​ಐಆರ್ (FIR)​ ದಾಖಲಿಸಿಕೊಂಡಿತ್ತು.

ಸಿಬಿಐ ದಾಳಿಯನ್ನು ಸಿಎಂ ಅರವಿಂದ್​ ಕೇಜ್ರಿವಾಲ್​ ಮತ್ತು ಮನೀಶ್​ ಸಿಸೋಡಿಯಾ ಸ್ವಾಗತಿಸಿದ್ದಾರೆ.

ನಾವು ಸಿಬಿಐನ್ನು ಸ್ವಾಗತಿಸುತ್ತೇವೆ. ಸಿಬಿಐ ತನಿಖೆಗೆ ಪೂರ್ಣ ಸಹಕಾರ ನೀಡುತ್ತೇವೆ ಮತ್ತು ಶೀಘ್ರವೇ ಸತ್ಯ ಹೊರಬರಲಿದೆ. ಇದುವರೆಗೆ ನನ್ನ ಮೇಲೆ ಹಲವು ಕೇಸ್​ ಹಾಕಲಾಗಿದೆಯಾದರೂ ಏನೂ ಸಿಕ್ಕಿಲ್ಲ. ಈ ಕೇಸಿನಲ್ಲೂ ಏನೂ ಸಿಗಲ್ಲ. ದೇಶದಲ್ಲಿ ಉತ್ತಮ ಶಿಕ್ಷಣಕ್ಕಾಗಿ ನನ್ನ ಕೆಲಸವನ್ನು ನಿಲ್ಲಿಸಲು ಸಾಧ್ಯವಿಲ್ಲ

ಎಂದು ಮನೀಶ್​ ಸಿಸೋಡಿಯಾ ಟ್ವೀಟಿಸಿದ್ದಾರೆ.