BIG BREAKING: ಈ ಕಾಂಗ್ರೆಸ್​ ಶಾಸಕಿಗೆ ಈ ಬಾರಿ ಟಿಕೆಟ್​ ಇಲ್ಲ..! – ಬಿಜೆಪಿಗೆ ಹೋಗಲು ಸಿದ್ಧತೆ

ಮಹತ್ವದ ರಾಜಕೀಯ ಬೆಳವಣಿಗೆಯಲ್ಲಿ ಈ ಬಾರಿ ಕಾಂಗ್ರೆಸ್​ ಶಾಸಕಿಯೊಬ್ಬರಿಗೆ ಕಾಂಗ್ರೆಸ್​ ಟಿಕೆಟ್​ ನಿರಾಕರಿಸಿದೆ.

ಧಾರವಾಡ ಜಿಲ್ಲೆಯ ಕುಂದಗೋಳ ವಿಧಾನಸಭಾ ಕ್ಷೇತ್ರದ ಶಾಸಕಿ ಕುಸುಮಾ ಶಿವಳ್ಳಿ ಅವರಿಗೆ ಕಾಂಗ್ರೆಸ್​ ಈ ಬಾರಿ ಟಿಕೆಟ್​ ನೀಡುತ್ತಿಲ್ಲ.

2018ರ ಚುನಾವಣೆಯಲ್ಲಿ ಕುಂದಗೋಳದಿಂದ ಸಿ ಎಸ್​ ಶಿವಳ್ಳಿ ಅವರು ಕಾಂಗ್ರೆಸ್​ ಶಾಸಕರಾಗಿ ಆಯ್ಕೆ ಆಗಿದ್ದರು. ಆದರೆ ಅವರ ಅಕಾಲಿಕ ಮರಣದ ಹಿನ್ನೆಲೆಯಲ್ಲಿ 2019ರ ಉಪ ಚುನಾವಣೆಯಲ್ಲಿ ಶಿವಳ್ಳಿ ಅವರ ಪತ್ನಿ ಕುಸುಮಾ ಶಿವಳ್ಳಿ ಅವರಿಗೆ ಕಾಂಗ್ರೆಸ್​ ಟಿಕೆಟ್​ ನೀಡಿತ್ತು.

ಉಪ ಚುನಾವಣೆಯಲ್ಲಿ ಕುಸುಮಾ ಅವರು ಕೇವಲ 1,601 ಮತಗಳ ಅಂತರದಿಂದ ಗೆದ್ದಿದ್ದರು.

ಆದರೆ ಈ ಬಾರಿ ಕುಸುಮಾ ಅವರ ವಿರುದ್ಧವೇ ವಿರೋಧಿ ಅಲೆ ಇರುವ ಹಿನ್ನೆಲೆಯಲ್ಲಿ ಶಾಸಕಿಗೆ ಕಾಂಗ್ರೆಸ್​ ಈ ಬಾರಿ ಟಿಕೆಟ್​ ನೀಡುತ್ತಿಲ್ಲ.

ಕಾಂಗ್ರೆಸ್​ಗೆ ಯಡಿಯೂರಪ್ಪ ಆಪ್ತ..?

ಮೂಲಗಳ ಪ್ರಕಾರ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರ ಆಪ್ತ ಎಸ್​ ಐ ಸಿದ್ದನಗೌಡರ್​​ ಅವರು ಕಾಂಗ್ರೆಸ್​ ಬರುವ ಸಾಧ್ಯತೆ ಇದೆ.

ಈಗಾಗಲೇ ಕಾಂಗ್ರೆಸ್​ ನಾಯಕರ ಜೊತೆಗಿನ ಮಾತುಕತೆ ಫಲಪ್ರದವಾಗಿದೆ ಎಂದು ಮೂಲಗಳು ತಿಳಿಸಿವೆ.

ಕುಸುಮಾ ಅವರ ಬದಲಿಗೆ ಶಿವನಗೌಡರ್​ ಅವರು ಪಕ್ಷಕ್ಕೆ ಬಂದರೆ ಕಾಂಗ್ರೆಸ್​ ಟಿಕೆಟ್​ ನೀಡುವ ನಿರೀಕ್ಷೆ ಇದೆ.

ಚಿಕ್ಕನಗೌಡ ಸಿದ್ದನಗೌಡರ್​​ ಮೂರು ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದ ಪಂಚಮಸಾಲಿ ಲಿಂಗಾಯತ ಸಮುದಾಯದವರು. 

2018ರ ಚುನಾವಣೆಯಲ್ಲಿ ಸಿ ಎಸ್​ ಶಿವಳ್ಳಿ ಅವರ ವಿರುದ್ಧ ಕೇವಲ 603 ಮತಗಳಿಂದ ಸೋತಿದ್ದರು.

ಸಿಎಂ ಬೊಮ್ಮಾಯಿ ಭೇಟಿಗೆ ಕುಸುಮಾ ಯತ್ನ, ಆದ್ರೆ ಭೇಟಿಯಾಗದ ಸಿಎಂ

ಈ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಶಾಸಕಿ ಕುಸುಮಾ ಶಿವಳ್ಳಿ ಅವರು ಇವತ್ತು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರನ್ನು ಭೇಟಿಯಾಗಲು ಯತ್ನಿಸಿದ್ದಾರೆ. ಭೇಟಿಗಾಗಿ ಹುಬ್ಬಳ್ಳಿಯಲ್ಲಿ ಯತ್ನಿಸಿದ್ದರು. ಆದ್ರೆ ಖುದ್ದು ಸಿಎಂ ಬೊಮ್ಮಾಯಿ ಅವರೇ ಕುಸುಮಾ ಭೇಟಿಗೆ ನಿರಾಕರಿಸಿದ್ದಾರೆ. 

ಕ್ಷೇತ್ರದ ಅಭಿವೃದ್ಧಿ ಬಗ್ಗೆ ಚರ್ಚೆ ಮಾಡಲು ಬಂದಿದ್ದೇ ಎಂದು ಕುಸುಮಾ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ಕೊಟ್ಟರು.

ಮಾಹಿತಿಗಳ ಪ್ರಕಾರ ಇವರು ಬಿಜೆಪಿಗೆ ಹೋಗಬಹುದು. ಇವತ್ತು ಕುಂದಗೋಳದಲ್ಲಿ ಆಯೋಜಿಸಲಾಗಿದ್ದ ಕಾಂಗ್ರೆಸ್​ನ ಪ್ರಜಾಧ್ವನಿ ಯಾತ್ರೆ ಕೂಡಾ ರದ್ದಾಗಿದೆ.