BREAKING: ಉಚಿತ ಬಸ್​ ಪ್ರಯಾಣಕ್ಕೆ ಗುರುತಿನ ಚೀಟಿ ಕಡ್ಡಾಯ – ಈ ಬಸ್​​ಗಳಲ್ಲಿ ಉಚಿತ ಪ್ರಯಾಣಕ್ಕೆ ಅವಕಾಶವಿಲ್ಲ

ಜೂನ್​ 11ರಿಂದ ರಾಜ್ಯದಲ್ಲಿ ಸರ್ಕಾರಿ ಬಸ್​​ಗಳಲ್ಲಿ ಮಹಿಳೆಯರಿಗೆ ಉಚಿತ ಬಸ್​ ಪ್ರಯಾಣದ ಯೋಜನೆ ಜಾರಿ ಆಗಲಿದೆ.

ಈ ಸಂಬಂಧ ಸಾರಿಗೆ ಇಲಾಖೆ ಕೆಲವು ಮಾರ್ಗಸೂಚಿಗಳನ್ನು ಹೊರಡಿಸಿದೆ.

ಗುರುತಿನ ಚೀಟಿ ಕಡ್ಡಾಯ:

ಜೂನ್​ 11ರಿಂದ ಬಸ್​ಗಳಲ್ಲಿ ಉಚಿತವಾಗಿ ಪ್ರಯಾಣಿಸುವ ಮಹಿಳೆಯರು ತಮ್ಮ ವಾಸ ಸ್ಥಳದ ದೃಢೀಕರಣಕ್ಕಾಗಿ ಭಾವಚಿತ್ರ ಇರುವ ಗುರುತಿನ ಚೀಟಿ ತೋರಿಸುವುದು ಕಡ್ಡಾಯ.

ಆಧಾರ್​ ಅಥವಾ ವೋಟರ್​ ಐಡಿ ಕಾರ್ಡ್​ನ್ನು ತೋರಿಸುವ ಮೂಲಕ ಶೂನ್ಯ ಟಿಕೆಟ್​ನ್ನು ಪಡೆಯಬೇಕಾಗುತ್ತದೆ.

ಶಕ್ತಿ ಸ್ಮಾರ್ಟ್​ ಕಾರ್ಡ್​:

ಸೇವಾ ಸಿಂಧುವಿನಲ್ಲಿ ಅರ್ಜಿ ಸಲ್ಲಿಸಿ ಸೆಪ್ಟೆಂಬರ್​ 11ರೊಳಗಾಗಿ ಶಕ್ತಿ ಸ್ಮಾರ್ಟ್​ ಕಾರ್ಡ್​ನ್ನು ಪಡೆದುಕೊಳ್ಳಬೇಕಾಗುತ್ತದೆ. ಶಕ್ತಿ ಸ್ಮಾರ್ಟ್​ ಕಾರ್ಡ್​ ಸಿಕ್ಕ ಬಳಿಕ ಅದನ್ನೇ ಗುರುತಿನ ಚೀಟಿಯಾಗಿ ತೋರಿಸಿ ಬಸ್​ಗಳಲ್ಲಿ ಉಚಿತ ಪ್ರಯಾಣ ಮಾಡಬಹುದು.

ಈ ಬಸ್​ಗಳಲ್ಲಿ ಉಚಿತ ಪ್ರಯಾಣ ಇಲ್ಲ:

ಐಷಾರಾಮಿ ಬಸ್​ಗಳಾದ ರಾಜಹಂಸ, ನಾನ್​ ಎಸಿ ಸ್ಲೀಪರ್​, ಎಸಿ ಸ್ಲೀಪರ್​,, ವಜ್ರ, ವಾಯುವಜ್ರ, ಐರಾವತ, ಐರಾವತ ಕ್ಲಬ್​ ಕ್ಲಾಸ್​, ಐರಾವತ ಗೋಲ್ಡ್​ ಕ್ಲಾಸ್​, ಅಂಬಾರಿ, ಅಂಬಾರಿ ಡ್ರೀಮ್​ ಕ್ಲಾಸ್​ , ಅಂಬಾರಿ ಉತ್ಸವ್​, ಫ್ಲೈ ಬಸ್​, ಇವಿ ಪವರ್​ ಬಸ್​​ಗಳಲ್ಲಿ ಉಚಿತ ಪ್ರಯಾಣಕ್ಕೆ ಅವಕಾಶವಿಲ್ಲ.

ಪುರುಷರಿಗೆ ಶೇಕಡಾ 50ರಷ್ಟು ಮೀಸಲು:

ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ) ಬಸ್​ಗಳನ್ನು ಹೊರತುಪಡಿಸಿ ಕೆಎಸ್​ಆರ್​ಟಿಸಿ, ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ನಿಗಮ, ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮಗಳ ಎಲ್ಲ ಬಸ್​ಗಳಲ್ಲಿ (AC ಮತ್ತು ಅಂತಾರಅಜ್ಯ ಬಸ್​ಗಳನ್ನು ಹೊರತುಪಡಿಸಿ) ಪುರುಷರಿಗೆ ಶೇಕಡಾ 50ರಷ್ಟು ಆಸನವನ್ನು ಮೀಸಲಿಡಲಾಗುವುದು.

ರಾಜ್ಯದೊಳಗಿನ ಪ್ರಯಾಣಕ್ಕೆ ಮಾತ್ರ:

ರಾಜ್ಯದೊಳಗಿನ ಪ್ರಯಾಣಕ್ಕೆ ಮಾತ್ರ ಮಹಿಳೆಯರು ಈ ಯೋಜನೆಯ ಲಾಭ ಪಡೆಯಬಹುದು.

ಮೂರು ತಿಂಗಳಲ್ಲಿ ಶಕ್ತಿ ಸ್ಮಾರ್ಟ್​ ಕಾರ್ಡ್​ ವಿತರಣೆ:

ಸೇವಾ ಸಿಂಧು ಮೂಲಕ ವೆಬ್​ಸೈಟ್​ ಮೂಲಕ ಅರ್ಜಿಗಳನ್ನು ಪಡೆದು ಶಕ್ತಿ ಸ್ಮಾರ್ಟ್​ ಕಾರ್ಡ್​​ಗಳನ್ನು ವಿತರಿಸುವ ಪ್ರಕ್ರಿಯೆಯನ್ನು ಮೂರು ತಿಂಗಳೊಳಗಾಗಿ ಪೂರ್ಣಗೊಳಿಸಲಾಗುತ್ತದೆ.

ವಾಸದ ವಿಳಾಸದ ದಾಖಲೆ ತೋರಿಸುವುದು ಕಡ್ಡಾಯ:

ಶಕ್ತಿ ಸ್ಮಾರ್ಟ್​ ಕಾರ್ಡ್​ ಸಿಗುವವರೆಗೆ ಬಸ್​ನಲ್ಲಿ ಪ್ರಯಾಣದ ವೇಳೆ ರಾಜ್ಯ ಅಥವಾ ಕೇಂದ್ರ ಸರ್ಕಾರದಿಂದ ಪಡೆದಿರುವ ಭಾವಚಿತ್ರ ಇರುವ ಮತ್ತು ವಾಸದ ವಿಳಾಸ ಇರುವ ಗುರುತಿನ ಚೀಟಿಯನ್ನು ತೋರಿಸಿ ಶೂನ್ಯ ಟಿಕೆಟ್​ ಪಡೆದುಕೊಳ್ಳಬೇಕು.