Free Power: ಉಚಿತ ವಿದ್ಯುತ್​ – ಈ ತಿಂಗಳಿಂದ ವಿದ್ಯುತ್ ​ಶುಲ್ಕ ಶೂನ್ಯ

ಸಿಎಂ ಸಿದ್ದರಾಮಯ್ಯ ಸರ್ಕಾರದ ಅತ್ಯಂತ ಮಹತ್ವಾಕಾಂಕ್ಷಿ ಗ್ಯಾರಂಟಿ ಯೋಜನೆಗಳಲ್ಲಿ ಒಂದಾಗಿರುವ ಉಚಿತ ವಿದ್ಯುತ್​ ಗೃಹ ಜ್ಯೋತಿ ಯೋಜನೆ ಇವತ್ತಿನಿಂದ ಜಾರಿಯಾಗಲಿದೆ.

ಜುಲೈ 27ರೊಳಗೆ ಅರ್ಜಿ ಸಲ್ಲಿಸಿರುವ ಫಲಾನುಭವಿಗಳಿಗೆ ಆಗಸ್ಟ್​ ತಿಂಗಳಲ್ಲಿ ಬರುವ ಜುಲೈ ವಿದ್ಯುತ್​ ಬಳಕೆಯ ಬಿಲ್​ನಲ್ಲಿ ಶೂನ್ಯ ಶುಲ್ಕ ಅಥವಾ ಝೀರೋ ಬಿಲ್​ ಬರಲಿದೆ. ಅಂದರೆ ಈ ತಿಂಗಳು ಮೀಟರ್​ ರೀಡಿಂಗ್​ ವೇಳೆ ಕೊಡುವ ಬಿಲ್​ಗೆ ಶುಲ್ಕ ಪಾವತಿಸಬೇಕಿಲ್ಲ.

ರಾಜ್ಯ ಸರ್ಕಾರದ ಅಧಿಕೃತ ಮಾಹಿತಿ ಪ್ರಕಾರ 1 ಕೋಟಿ 42 ಲಕ್ಷ ಕುಟುಂಬಗಳು ಗೃಹಜ್ಯೋತಿ ಯೋಜನೆಗೆ ನೋಂದಣಿ ಮಾಡಿಕೊಂಡಿವೆ. 

ಜುಲೈ 27ರೊಳಗೆ ಅರ್ಜಿ ಸಲ್ಲಿಸಿರುವ ಕುಟುಂಬಗಳಿಗೆ ಜುಲೈ ತಿಂಗಳ ವಿದ್ಯುತ್​ ಬಿಲ್​ನಲ್ಲಿ ಶೂನ್ಯ ಶುಲ್ಕ ಇರಲಿದೆ.

ಆದರೆ ಅರ್ಜಿ ಸಲ್ಲಿಕೆಗೆ ಯಾವುದೇ ಗಡುವು ಇರಲ್ಲ. ಅಂದರೆ ಜುಲೈ 28ರ ಬಳಿಕ ಸಲ್ಲಿಕೆ ಮಾಡಿದ ಗ್ರಾಹಕರಿಗೆ ಆಗಸ್ಟ್​ ತಿಂಗಳಲ್ಲಿ ಬಳಕೆ ಮಾಡುವ ಆದರೆ ಸೆಪ್ಟೆಂಬರ್​ನಲ್ಲಿ ಸಿಗುವ ಬಿಲ್​ನಲ್ಲಿ ವಿನಾಯಿತಿ ಸಿಗಲಿದೆ.

ಆಗಸ್ಟ್​ 5ರಂದು ಕೈಗೆ ಸಿಗುವ ವಿದ್ಯುತ್​ ಬಿಲ್​ನಲ್ಲಿ ಗೃಹ ಜ್ಯೋತಿ ಯೋಜನೆಯಡಿ ಶೂನ್ಯ ಮೊತ್ತ ಇರಲಿದೆ. ಕಲಬುರಗಿಯಲ್ಲಿ ಆಗಸ್ಟ್​ 5ರಂದು ನಡೆಯುವ ಕಾರ್ಯಕ್ರಮದಲ್ಲಿ ಗೃಹಜ್ಯೋತಿಗೆ ಚಾಲನೆ ಸಿಗಲಿದೆ.

ಮೂರು ಮಾನದಂಡ:

ಗೃಹ ಜ್ಯೋತಿ ಯೋಜನೆಯ ಲಾಭ ಪಡೆಯಲು ಮೂರು ಮಾನದಂಡಗಳನ್ನು ರಾಜ್ಯ ಸರ್ಕಾರ ಅಳವಡಿಸಿದೆ.

ಮಾನದಂಡ 1: ಒಂದು ವರ್ಷದ ವಾರ್ಷಿಕ ಸರಾಸರಿ ವಿದ್ಯುತ್​ ಬಳಕೆಯ ಜೊತೆಗೆ ಶೇಕಡಾ 10ರಷ್ಟು ಹೆಚ್ಚುವರಿ ವಿದ್ಯುತ್​ ಬಳಕೆ ಮಾಡುವ ಕುಟುಂಬಗಳಿಗೆ ಗೃಹ ಜ್ಯೋತಿ ಯೋಜನೆಯಡಿ ಶೂನ್ಯ ಶುಲ್ಕ (Zero Bill) ಇರಲಿದೆ. 

ಉದಾಹರಣೆಗೆ: ಒಂದು ಕುಟುಂಬ ವಾರ್ಷಿಕ 50 ಯುನಿಟ್​ ವಿದ್ಯುತ್​ ಬಳಸ್ತಿದ್ದರೆ ಆಗ 50 ಯುನಿಟ್​ ಜೊತೆಗೆ ಹೆಚ್ಚುವರಿ 5 ಯುನಿಟ್​ ಅಂದರೆ 55 ಯುನಿಟ್​ ವಿದ್ಯುತ್​ ಬಳಕೆಗೆ ಅವಕಾಶ ಇರಲಿದೆ. ಈ ಮಿತಿಯೊಳಗೆ ವಿದ್ಯುತ್​ ಬಳಕೆಯಿದ್ದರೆ ಆಗ Zero Bill ಸಿಗಲಿದೆ.

ಮಾನದಂಡ 2: ಒಂದು ವರ್ಷದ ವಾರ್ಷಿಕ ಸರಾಸರಿ ವಿದ್ಯುತ್​ ಬಳಕೆಯ ಜೊತೆಗೆ ಶೇಕಡಾ 10ರಷ್ಟು ಹೆಚ್ಚುವರಿ ವಿದ್ಯುತ್​ ಬಳಕೆಯನ್ನೂ ಮೀರಿದರೆ ಆಗ ಆ ಮಿತಿಯನ್ನು ಮೀರಿದ ವಿದ್ಯುತ್​ ಬಳಕೆಗಷ್ಟೇ ಶುಲ್ಕ ಪಾವತಿಸಬೇಕಾಗುತ್ತದೆ.

ಆದರೆ ಈ ಮಾನದಂಡ ಪ್ರಕಾರ ನಿಗದಿತ ಶುಲ್ಕ ಮತ್ತು ಇಂಧನ ಹೊಂದಾಣಿಕೆ ಶುಲ್ಕ ಪಾವತಿಸಬೇಕಾಗುತ್ತದೆ.

ಉದಾಹರಣೆಗೆ: ಒಂದು ಕುಟುಂಬ ವಾರ್ಷಿಕ 50 ಯುನಿಟ್​ ವಿದ್ಯುತ್​ ಬಳಸ್ತಿದ್ದರೆ ಆಗ 50 ಯುನಿಟ್​ ಜೊತೆಗೆ ಹೆಚ್ಚುವರಿ 5 ಯುನಿಟ್​ ಅಂದರೆ 55 ಯುನಿಟ್​ ವಿದ್ಯುತ್​ ಬಳಕೆಗೆ ಅವಕಾಶ ಇರಲಿದೆ. ಒಂದು ವೇಳೆ 55 ಯುನಿಟ್​ನ ಮಿತಿ ಬದಲು 65 ಯುನಿಟ್​ ಬಳಸಿದರೆ ಆಗ 65-55 = 10 ಯುನಿಟ್​ ಅಂದರೆ ಮಿತಿಯನ್ನು ಮೀರಿ ಬಳಸಿದ 10 ಯುನಿಟ್​ಗಷ್ಟೇ ವಿದ್ಯುತ್​ ಶುಲ್ಕ ಪಾವತಿಸಬೇಕಾಗುತ್ತದೆ.

ಆದರೆ ಈ 10 ಯುನಿಟ್​ ಮೊತ್ತದ ಜೊತೆಗೆ ನಿಗದಿತ ಶುಲ್ಕ, ಇಂಧನ ಹೊಂದಾಣಿಕೆ ಶುಲ್ಕ ಮತ್ತು 10 ಯುನಿಟ್​ ಮೇಲೆ ವಿಧಿಸಲಾಗುವ ಶೇಕಡಾ 9ರಷ್ಟು ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ.

ಮಾನದಂಡ 3: ಈ ಮಾನದಂಡ ಪ್ರಕಾರ ಒಂದು ವೇಳೆ ವಿದ್ಯುತ್​ ಬಳಕೆ 200 ಯುನಿಟ್​ ಮೀರಿದರೆ ಆಗ ಆ ಕುಟುಂಬ ತಾವು ಬಳಸಿದ ಸಂಪೂರ್ಣ ವಿದ್ಯುತ್​ಗೆ ಶುಲ್ಕ ಪಾವತಿಸಬೇಕಾಗುತ್ತದೆ. ಈ ಕುಟುಂಬಕ್ಕೆ ಯಾವುದೇ ರಿಯಾಯಿತಿ ಸಿಗಲ್ಲ.