ಹಾಸನದಿಂದ ಯಾರಿಗೆ ಟಿಕೆಟ್​ – ರೇವಣ್ಣ ಎದುರೇ ಗಲಾಟೆ – ಮೈಕ್​ ಎಸೆದ HDR

2023ರ ವಿಧಾನಸಭಾ ಚುನಾವಣೆಯಲ್ಲಿ (Assembly Election) ಹಾಸನ ನಗರ (Hassan) ವಿಧಾನಸಭಾ ಕ್ಷೇತ್ರದಿಂದ ಜೆಡಿಎಸ್​ನಿಂದ (JDS) ಯಾರಿಗೆ ಟಿಕೆಟ್​ ನೀಡಬೇಕು ಎನ್ನುವುದು ಈಗ ಪಕ್ಷದಲ್ಲೇ ಬಹಿರಂಗ ಸಂಘರ್ಷ, ಗಲಾಟೆಗೆ ವಸ್ತುವಾಗಿದೆ.

ಹಾಸನ ಕ್ಷೇತ್ರದಿಂದ ಮಾಜಿ ಜೆಡಿಎಸ್​ ಶಾಸಕ ದಿವಂಗತ ಹೆಚ್​ ಎಸ್​ ಪ್ರಕಾಶ್​ (Late H S Prakash) ಅವರ ಮಗ ಸ್ವರೂಪ್​ ಅವರಿಗೆ ಟಿಕೆಟ್​ ನೀಡುವಂತೆ ಆಗ್ರಹಿಸಿ ಮಾಜಿ ಸಚಿವ ಹೆಚ್​ ಡಿ ರೇವಣ್ಣ ( H D Revanna) ಎದುರೇ ಸ್ವರೂಪ್​ ಅವರ ಬೆಂಬಲಿಗರು ಗಲಾಟೆ ಮಾಡಿದ್ದಾರೆ.

ಜೆಡಿಎಸ್​ ಕಾರ್ಯಕರ್ತರ ಸಭೆಯಲ್ಲಿ ಸ್ವರೂಪ್​ ಅವರ ಬೆಂಬಲಿಗರು ಗಲಾಟೆ ಮಾಡಿದ್ದಾರೆ. ರೇವಣ್ಣ ವಿರುದ್ಧವೇ ಕಿಡಿಕಾರಿದ್ದಾರೆ. ಸ್ವರೂಪ್​ ಬೆಂಬಲಿಗರ ಗಲಾಟೆಯಿಂದ ತಾಳ್ಮೆ ಕಳೆದುಕೊಂಡ ಹೊರಹೋಗಿ ಎಂದು ಗದರಿದರು. ಜೊತೆಗೆ ರೇವಣ್ಣ ತಾವು ಹಿಡಿದಿದ್ದ ಮೈಕ್​ ಎಸೆದ ಘಟನೆಯೂ ನಡೆಯಿತು.

ಸ್ವರೂಪ್​ ಅವರು ತಮ್ಮ ಬೆಂಬಲಿಗರನ್ನು ಸಮಾಧಾನಪಡಿಸಲು ಯತ್ನಿಸಿದರು. ಆದರೆ ಆ ಪ್ರಯತ್ನ ಫಲಕೊಡಲಿಲ್ಲ. ಬಳಿಕ ಸ್ವರೂಪ್​ ಬೆಂಬಲಿಗರು ಪಕ್ಷದ ಸಭೆ ಬಹಿಷ್ಕರಿಸಿ ಹೊರನಡೆದರು.

ಮಾಜಿ ಪ್ರಧಾನಿ ಹೆಚ್​ ಡಿ ದೇವೇಗೌಡ (H D Devegowda), ರೇವಣ್ಣ ಅವರ ಪತ್ನಿ ಭವಾನಿ ರೇವಣ್ಣ (Bhavani Revanna) ಮತ್ತು ಮತ್ತೋರ್ವ ಟಿಕೆಟ್​ ಆಕಾಂಕ್ಷಿ ಪ್ರಸಾದ್​ ಗೌಡ ಅವರ ಪೋಟೋಗಳಿದ್ದ ಫ್ಲೆಕ್ಸ್​ಗಳನ್ನು ಸ್ವರೂಪ್​ ಬೆಂಬಲಿಗರು ಹರಿದು ಹಾಕಿದರು.

ರೇವಣ್ಣ ಪತ್ನಿ ಭವಾನಿ ರೇವಣ್ಣ ಕೂಡಾ ಈ ಬಾರಿ ಹಾಸನ ಕ್ಷೇತ್ರದಿಂದ ಜೆಡಿಎಸ್​ ಟಿಕೆಟ್​ ಆಕಾಂಕ್ಷಿಯಾಗಿದ್ದಾರೆ.