ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ)ಯು ಇಂದು ಟ್ವೆಂಟಿ-20 ತಂಡ ರ್ಯಾಂಕಿಂಗ್ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಈ ಬಾರಿ ಇಂಗ್ಲೆಂಡ್ ತಂಡವನ್ನು ಹಿಂದಿಕ್ಕಿರುವ ಭಾರತ ಮೊದಲ ಸ್ಥಾನವನ್ನು ಆಕ್ರಮಿಸಿದೆ.
ಈಡನ್ ಗಾರ್ಡನ್ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ನಡೆದ ಅಂತಿಮ ಟಿ-20 ಅಂತಿಮ ಪಂದ್ಯದಲ್ಲಿ 17 ರನ್ ಅಂತರದ ಗೆಲುವು ದಾಖಲಿಸಿರುವ ಟೀಮ್ ಇಂಡಿಯಾ, ಸರಣಿಯನ್ನು 3-0 ಅಂತರದಿಂದ ಕ್ಲೀನ್ ಸ್ವೀಪ್ ಮಾಡಿತ್ತು. ಈ ಮೂಲಕ ರೋಹಿತ್ ಶರ್ಮಾನಾಯಕತ್ವದ ಭಾರತ ತಂಡವು ವಿಂಡೀಸ್ ವಿರುದ್ಧ ಏಕದಿನ ಹಾಗೂ ಟಿ20 ಸರಣಿಗಳಲ್ಲಿ ವೈಟ್ವಾಶ್ ಸಾಧನೆಗೈದಿದೆ.
ಭಾರತದ ತಂಡವು ಇಂಗ್ಲೆಂಡ್ ಜೊತೆಗೆ ಸಮಾನ ರೇಟಿಂಗ್ (269) ಹಂಚಿಕೊಂಡಿದೆ. ಆದರೆ 39 ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ ಒಟ್ಟು 10,484 ಅಂಕಗಳನ್ನು ಕಲೆ ಹಾಕಿ ಅಗ್ರಸ್ಥಾನ ವಶಪಡಿಸಿಕೊಂಡಿದೆ. ಇಂಗ್ಲೆಂಡ್ ಅಷ್ಟೇ ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ 10,474 ಅಂಕಗಳನ್ನು ಹೊಂದಿದೆ. ಭಾರತದ ವಿರುದ್ಧದ ಸರಣಿ ಸೋಲಿನಿಂದ ವಿಂಡೀಸ್ (235) ಏಳನೇ ಸ್ಥಾನಕ್ಕೆ ಕುಸಿದಿದೆ. ಇದೇ ಸಮಯದಲ್ಲಿ ಭಾರತ ತಂಡವು ಟೆಸ್ಟ್ನಲ್ಲಿ ಮೂರು ಹಾಗೂ ಏಕದಿನದಲ್ಲಿ ನಾಲ್ಕನೇ ಸ್ಥಾನವನ್ನು ಹೊಂದಿದೆ.
ಐಸಿಸಿ ಟ್ವೆಂಟಿ-20 ತಂಡ ರ್ಯಾಂಕಿಂಗ್ ಪಟ್ಟಿ ಇಂತಿದೆ:
1. ಭಾರತ (269)
2. ಇಂಗ್ಲೆಂಡ್ (269)
3. ಪಾಕಿಸ್ತಾನ (266)
4. ನ್ಯೂಜಿಲೆಂಡ್ (255)
5. ದ.ಆಫ್ರಿಕಾ (253)
6. ಆಸ್ಟ್ರೇಲಿಯಾ (249)
7. ವೆಸ್ಟ್ ಇಂಡೀಸ್ (235)