ಮೂರೂ ಸ್ಥಾನ ಗೆಲ್ಲಲಿದೆ ಕಾಂಗ್ರೆಸ್​, JDS ಸ್ಥಿತಿ ದಯನೀಯ – ಪರಿಷತ್​ನಲ್ಲಿ ಕೈ ಸಂಖ್ಯೆ ಹೆಚ್ಚಳಕ್ಕೆ ಹಾದಿ ಸುಗಮ

ಅವಧಿಗೂ ಮೊದಲೇ ಖಾಲಿಯಾಗಿರುವ ವಿಧಾನಪರಿಷತ್​ನ ಮೂರು ಸ್ಥಾನಗಳಿಗೆ ಭಾರತದ ಚುನಾವಣಾ ಆಯೋಗ ಉಪ ಚುನಾವಣೆ ಘೋಷಿಸಿದೆ.

ವಿಧಾನಸಭಾ ಚುನಾವಣೆಯಲ್ಲಿ ಪ್ರಚಂಡ ಜಯ ಸಾಧಿಸಿರುವ ಕಾಂಗ್ರೆಸ್​ ಪರಿಷತ್​ ಉಪ ಚುನಾವಣೆಯಲ್ಲೂ ಮೂರು ಸ್ಥಾನಗಳನ್ನು ಗೆಲ್ಲಲಿದೆ.

ವಿಧಾನಸಭಾ ಸದಸ್ಯರು ಅಂದರೆ ಶಾಸಕರು ತಮ್ಮ ಮತದಾನದ ಮೂಲಕ ಪರಿಷತ್​ಗೆ ಸದಸ್ಯರನ್ನು ಆಯ್ಕೆ ಮಾಡಲಿದ್ದಾರೆ.

ವಿಧಾನಸಭೆಯಲ್ಲಿ ಬಲಾಬಲ:

ಮೇ 13ರಂದು ಪ್ರಕಟವಾಗಿರುವ ಫಲಿತಾಂಶದ ಪ್ರಕಾರ ವಿಧಾನಸಭೆಯಲ್ಲಿ ಕಾಂಗ್ರೆಸ್​ 135 ಮತ್ತು ಬಿಜೆಪಿ 65 ಮತ್ತು ಜೆಡಿಎಸ್​ ಕೇವಲ 19 ಶಾಸಕರನ್ನು ಹೊಂದಿದೆ.

ಸರ್ವೋದಯ ಕರ್ನಾಟಕ ಪ್ರಗತಿ ಪಕ್ಷ -1, ಕಲ್ಯಾಣ ಕರ್ನಾಟಕ ಪ್ರಗತಿ ಪಕ್ಷ -1 ಶಾಸಕರನ್ನು ಹೊಂದಿದೆ.

ಪಕ್ಷೇತರ ಶಾಸಕಿ ಲತಾ ಮಲ್ಲಿಕಾರ್ಜುನ್​ ಕಾಂಗ್ರೆಸ್​​ಗೆ ಸೇರ್ಪಡೆಯಾಗಿದ್ದಾರೆ. ಗೌರಿಬಿದನೂರಿನಿಂದ ಪಕ್ಷೇತರ ಶಾಸಕರಾಗಿ ಕೆ ಹೆಚ್​ ಪುಟ್ಟಸ್ವಾಮಿ ಗೌಡ ಆಯ್ಕೆಯಾಗಿದ್ದಾರೆ.

ಪರಿಷತ್​ ಚುನಾವಣೆ ಗೆಲ್ಲಲು ಅಗತ್ಯ ಮತ:

224 ಸದಸ್ಯ ಬಲದ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಎಂಎಲ್​ಸಿ ಆಗಿ ಆಯ್ಕೆ ಆಗಲು 29 ಶಾಸಕರ ಮತಗಳನ್ನು ಪಡೆಯುವುದು ಅನಿವಾರ್ಯ.

ಈ ಲೆಕ್ಕಾಚಾರದಲ್ಲಿ 135+2 ಶಾಸಕರ ಬಲ ಹೊಂದಿರುವ ಕಾಂಗ್ರೆಸ್​ ಮೂರು ಸ್ಥಾನಗಳನ್ನು ಗೆಲ್ಲಲಿದೆ.

ಜೆಡಿಎಸ್​​ಗೆ ಅಭ್ಯರ್ಥಿ ಕಣಕ್ಕಿಳಿಸಲು ಸಾಧ್ಯವಿಲ್ಲ:

ಜೆಡಿಎಸ್​ನದ್ದು ದಯನೀಯ ಸ್ಥಿತಿ. ಜೆಡಿಎಸ್​ಗೆ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲು ಅಗತ್ಯವಾದ ಕನಿಷ್ಠ 29 ಶಾಸಕರ ಮತಗಳೂ ಇಲ್ಲ.

ಪರಿಷತ್​ನಲ್ಲಿ ಹೆಚ್ಚಲಿದೆ ಕಾಂಗ್ರೆಸ್​ ಬಲ:

ಸದ್ಯಕ್ಕೆ 75 ಸದಸ್ಯ ಬಲದ ಪರಿಷತ್​ನಲ್ಲಿ ಬಿಜೆಪಿ 35, ಕಾಂಗ್ರೆಸ್​ 25 ಮತ್ತು ಜೆಡಿಎಸ್​ 8 ಸದಸ್ಯರನ್ನು ಹೊಂದಿದೆ. ಲಖನ್​ ಜಾರಕಿಹೊಳಿ ಪಕ್ಷೇತರ ಸದಸ್ಯರಾಗಿದ್ದಾರೆ. ಬಿಜೆಪಿಯಿಂದಲೇ ಆಯ್ಕೆಯಾಗಿರುವ ಬಸವರಾಜ ಹೊರಟ್ಟಿಯವರು ಸಭಾಪತಿಯಾಗಿದ್ದಾರೆ.

ಉಪ ಚುನಾವಣೆಯ ಬಳಿಕ ಕಾಂಗ್ರೆಸ್​ ಬಲಾಬಲ 28ಕ್ಕೆ ಏರಿಕೆ ಆಗಲಿದೆ. ಸದನದಲ್ಲಿ ಬಹುಮತಕ್ಕೆ 38 ಸದಸ್ಯರ ಬೆಂಬಲ ಅಗತ್ಯ​.