KGF2.. KGF2… ಕಳೆದ ಕೆಲ ದಿನಗಳಿಂದ ಎಲ್ಲರ ಬಾಯಲ್ಲಿ ಇದೇ ಮಾತು. ಬಾಕ್ಸ್ ಆಫೀಸ್ ನಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ರಾಕಿಂಗ್ ಸ್ಟಾರ್ ಯಶ್ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಹೊರಹೊಮ್ಮಿದ್ದಾರೆ. ಹಾಲಿವುಡ್ ಲೆವೆಲ್ ನ ಸಿನಿಮಾಗೆ ಕಾರಣ ಸ್ಟಾರ್ ಡೈರೆಕ್ಟರ್ ಪ್ರಶಾಂತ್ ನೀಲ್ ಎಂದರೇ ತಪ್ಪಾಗಲಿಕ್ಕಿಲ್ಲ.
ಅಷ್ಟಕ್ಕೂ ಪ್ರಶಾಂತ್ ನೀಲ್ ಯಾರು? ಅವರ ಹಿನ್ನೆಲೆ ಏನು ಎಂಬುದನ್ನು ಕೆದಕಿದ್ರೆ ಸಿಗೋದು ವೆರಿ ಇಂಟ್ರೆಸ್ಟಿಂಗ್ ಮಾಹಿತಿ. ಪ್ರಶಾಂತ್ ನೀಲ್.. ನೀಲ್ ಹೆಸರಿನ ರಹಸ್ಯವೂ ಈಗ ಅನವರಣಗೊಂಡಿದೆ.
ಪ್ರಶಾಂತ್ ನೀಲ್ ಅವರದ್ದು ಮೂಲತಃ ಮಧುಗಿರಿ – ಪಾವಗಡದ ನಡುವೆ ಬರುವ ಆಂಧ್ರದ ಮಡಕಶಿರಾ ತಾಲ್ಲೂಕಿನ ನೀಲಕಂಠಪುರಂ. ತಮ್ಮ ಊರಿನ ಹೆಸರನ್ನು ಸಿಂಪಲ್ ಆಗಿ ತಮ್ಮ ಹೆಸರಿನ ಜೊತೆ ನೀಲ್ ಅಂತಾ ಇಟ್ಟುಕೊಂಡಿದ್ದಾರೆ.
ಪ್ರಶಾಂತ್ ನೀಲ್ ಕುಟುಂಬಕ್ಕೆ ರಾಜಕೀಯ ಹಿನ್ನೆಲೆಯೂ ಇದೇ. ಪ್ರಶಾಂತ್ ನೀಲ್ ತಂದೆ ಸುಭಾಷ್ ಸಹೋದರ ಆಂಧ್ರದ ಮಾಜಿ ಮಂತ್ರಿ ರಘುವೀರ ರೆಡ್ಡಿ. ಆದರೇ, ಸುಭಾಷ್ ಕುಟುಂಬ ಬೆಂಗಳೂರಿನಲ್ಲೇ ನೆಲೆಸಿತ್ತು. ಹೋಟೆಲ್ ಉದ್ಯಮಿಯಾಗಿ ಸುಭಾಷ್ ಯಶಸ್ಸು ಗಳಿಸಿದರು. ಪ್ರಶಾಂತ್ ನೀಲ್ ಕೂಡಾ ಬೆಂಗಳೂರಿನಲ್ಲಿಯೇ ಬೆಳೆದರು. ತಂದೆಯ ಹೈಲ್ಯಾಂಡ್ ಹೋಟೆಲ್ ನಲ್ಲಿ ನಡೆಯುತ್ತಿದ್ದ ಸಿನೆಮಾ ಶೂಟಿಂಗ್ ನಿಂದ ಆಕರ್ಷಣೆ ಹೊಂದಿದ ಪ್ರಶಾಂತ್ ನೀಲ್ ಈಗ ಜಗತ್ತೆ ಮೆಚ್ಚುವ ಸಿನಿಮಾ ನಿರ್ದೇಶಕನಾಗಿದ್ದು ಇತಿಹಾಸ.
2018ರಲ್ಲಿ ಕಾಲವಾದ ತಂದೆ ಸುಭಾಷ್ ಅಂತ್ಯಕ್ರಿಯೆಯನ್ನು ಸ್ವಗ್ರಾಮ ನೀಲಕಂಠಪುರದಲ್ಲಿಯೇ ಪ್ರಶಾಂತ್ ನೀಲ್ ನೆರವೇರಿಸಿದ್ದಾರೆ. ಆಗಾಗ ಸ್ವಗ್ರಾಮಕ್ಕೆ ಪ್ರಶಾಂತ್ ನೀಲ್ ಬಂದು ಹೋಗುತ್ತಾರೆ. KGF 2 ರಿಲೀಸ್ ಹಿಂದಿನ ರಾತ್ರಿಯೂ ನೀಲಕಂಠಪುರಕ್ಕೆ ಬಂದಿದ್ದ ಪ್ರಶಾಂತ್ ನೀಲ್, ಅಪ್ಪನ ಸಮಾಧಿಗೆ ನಮಿಸಿ ಹೋಗಿದ್ದರು ಎಂಬುದನ್ನು ಗ್ರಾಮಸ್ಥರು ನೆನಪಿಸಿಕೊಳ್ಳುತ್ತಾರೆ.
2014ರಲ್ಲಿ ಉಗ್ರಂ ಸಿನೆಮಾ ಡೈರೆಕ್ಟ್ ಮಾಡುವ ಮೂಲಕ ಸಿನೆಮಾ ರಂಗಕ್ಕೆ ಪ್ರಶಾಂತ್ ನೀಲ್ ಎಂಟ್ರಿ ಕೊಟ್ಟರು. ಉಗ್ರಂ ಸಿನೆಮಾ ಶೂಟಿಂಗ್ ಸಲುವಾಗಿ ಕೋಲಾರ್ ಗೋಲ್ಡ್ ಫೀಲ್ಡ್ಸ್ ಗೆ ಹೋಗಿದ್ದ ಪ್ರಶಾಂತ್ ನೀಲ್ ಗೆ, ಅಲ್ಲಿನ ಪರಿಸ್ಥಿತಿ ನೋಡಿ, ಆಗಲೇ ಒಂದೇಳೆ ಕತೆ ಸಿದ್ದಪಡಿಸಿದ್ದರು. ಮುಂದೆ ಅದೇ KGF ಸಿನೆಮಾ ಆಗಿದ್ದು ಇತಿಹಾಸ.
ಸಂತೋಷವಾಗಿದೆ ಎಂದ ಪ್ರಶಾಂತ್ ನೀಲ್ ತಾಯಿ
ನನ್ನ ಮಗ ಸಿನೆಮಾ ರಂಗಕ್ಕೆ ಕಾಲಿಟ್ಟ ಕೆಲವೇ ವರ್ಷಗಳಲ್ಲಿ ಗಳಿಸಿದ ಖ್ಯಾತಿ ಕಂಡು ಸಂತೋಷ ಆಗಿದೆ. ನನ್ನ ಮಗ ಪಟ್ಟ ಕಷ್ಟಕ್ಕೆ ಫಲಿತಾಂಶ ಸಿಕ್ಕಿದೆ. ಜಗತ್ತಿನಲ್ಲಿ ತನಗೆ ಅಂತಾ ಒಂದು ವಿಶೇಷತೆಯನ್ನು ಗಳಿಸಿಕೊಂಡಿದ್ದಾರೆ.
– ಭಾರತಿ, ಪ್ರಶಾಂತ್ ನೀಲ್ ತಾಯಿ
ಪ್ರಶಾಂತ್ ನೀಲ್ ಗಳಿಸಿದ ಖ್ಯಾತಿ ಕಾರಣ ಇವತ್ತು ಜಗತ್ತು ನೀಲಕಂಠಪುರ ಎಲ್ಲಿ ಎಂದು ಗೂಗಲ್ ಸರ್ಚ್ ಮಾಡುವಂತಾಗಿದೆ. ವರ್ಷಕ್ಕೆರಡು ಬಾರಿ ಪ್ರಶಾಂತ್ ನೀಲ್ ನಮ್ಮೂರಿಗೆ ಬಂದು ಹೋಗ್ತಾರೆ. ನಮ್ಮೂರು ಅಂದ್ರೆ ಪ್ರಶಾಂತ್ ಗೆ ಎಷ್ಟೋ ಇಷ್ಟ. ಮೊನ್ನೆ 14ಕ್ಕೆ ಬಂದು ಹೋದರು. ಭವಿಷ್ಯದಲ್ಲಿ ಮತ್ತಷ್ಟು ಯಶಸ್ಸು ಕಾಣಲಿ ಎಂಬುದೇ ನಮ್ಮ ಹಾರೈಕೆ.
– ಸಣ್ಣ ರಂಗೇಗೌಡ, ಪ್ರಶಾಂತ್ ನೀಲ್ ಚಿಕ್ಕಪ್ಪ
