ಪ್ರಸ್ತುತ ರಾಜ್ಯದಲ್ಲಿ ನಡೆಯುತ್ತಿರುವ ಮತೀಯ ಬೆಳವಣಿಗೆಗಳ ಬಗ್ಗೆ ಹಿರಿಯ ಸಾಹಿತಿ ಕುಂ ವೀರಭದ್ರಪ್ಪ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ಬೆಂಗಳೂರಿನ ಗಾಂಧಿಭವನದಲ್ಲಿ ನಡೆದ ಸರ್ವ ಜನಾಂಗದ ಶಾಂತಿಯ ತೋಟ.. ಒಂದು ಭಾವೈಕ್ಯತೆ ಚರ್ಚೆಯಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಹಿಂದೂ ಎಂಬ ಅಪಾಯಕಾರಿ ಪದದಿಂದಲೇ ದೇಶದಲ್ಲಿ ಅಶಾಂತಿ ಸೃಷ್ಟಿ ಆಗುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಹಲಾಲ್ ಒಂದು ಸಮಸ್ಯೆನಾ? ಎಂದು ಕುಂವಿ ಪ್ರಶ್ನಿಸಿದ್ದಾರೆ. ಹಿಜಾಬ್ ಒಂದು ವಸ್ತ್ರ ಅಷ್ಟೇ.. ಅದನ್ನೇಕೆ ವಿರೋಧ ಮಾಡುತ್ತೀರಿ ಎಂದು ಪ್ರಶ್ನೆ ಮಾಡಿದ್ದಾರೆ. ನೀವು ವ್ಯಾಪಾರ ಮಾಡಬೇಡಿ ಎಂದರೇ ಮುಸ್ಲಿಮರು ಎಲ್ಲಿಗೆ ಹೋಗಬೇಕು ಎಂದು ಕುಂ ವೀರಭದ್ರಪ್ಪ ಕೇಳಿದ್ದಾರೆ.ಈ ಎಲ್ಲಾ ಬೆಳವಣಿಗೆಗಳು ಸರ್ವಾಧಿಕಾರಿ ಶಕ್ತಿಗಳ ಮೊದಲನೇ ಹೆಜ್ಜೆಗಳು..ಇವರು ತಾಲಿಬಾನ್ ಸಂಸ್ಕೃತಿ ಹೇರಲು ಹೊರಟಿದ್ದಾರೆ. ಇದರ ವಿರುದ್ಧ ನಾವೆಲ್ಲ ಹೋರಾಟ ಮಾಡಿ, ತಡೆಯಬೇಕು ಎಂದು ಕರೆ ನೀಡಿದ್ದಾರೆ. ಬಸವರಾಜ ಬೊಮ್ಮಾಯಿ ಮುಖ್ಯಮಂತ್ರಿ ಆದಮೇಲೆ ಇವೆಲ್ಲ ಸರಿ ಹೋಗುವ ಬದಲು ಜಾಸ್ತಿ ಆಗಿವೆ ಎಂದು ಬೇಸರ ಹೊರಹಾಕಿದ್ದಾರೆ.
![](https://www.pratikshana.com/wp-content/uploads/2022/03/img-20220330-wa00386112285566123497323-459x1024.jpg)
ಹಿಂದೂ ಎಂಬುದು ಕೇವಲ ಪದ ಅಷ್ಟೇ.
ದೇಶದಲ್ಲಿ ಹಿಂದೂಗಳು ಬಹುಸಂಖ್ಯಾತರು ಎನ್ನುವುದು ಸರಿಯಲ್ಲ. ಅದು ಪ್ರಮುಖ ವಿಚಾರವೂ ಅಲ್ಲ. ಅಸಹಿಷ್ಣುತೆ ಸರಿಯಲ್ಲ.ದೇಶದಲ್ಲಿ 20 ಕೋಟಿ ಮುಸ್ಲಿಮರು,ಸಿಖ್ಖರು ಜೈನರು ಎಲ್ಲರೂ ಇದ್ದಾರೆ. ನಮ್ಮದು ಸರ್ವ ಜನಾಂಗದ ಶಾಂತಿಯ ತೋಟ ಆಗಬೇಕು ಎಂದಿದ್ದಾರೆ.
ದೇಶದಲ್ಲಿ ನಾಥುರಾಂ ಗೋಡ್ಸೆ, ಗೋಲ್ವಳ್ಕರ್, ಹೆಡಗೇವಾರ್ ಥರದ ಅನೇಕ ದೆವ್ವಗಳಿವೆ. ಎನ್ನುವ ಮೂಲಕ RSS ಅನ್ನು ಕುಂ ವೀರಭದ್ರಪ್ಪ ತರಾಟೆಗೆ ತೆಗೆದುಕೊಂಡಿದ್ದಾರೆ.
ಈ ದೆವ್ವಗಳು ಕೆಲವರ ಮೈಯ್ಯಲ್ಲಿ ಹೊಕ್ಕಾಗ ಏನೇನೋ ಹೇಳಿಕೆ ಕೊಡ್ತಾರೆ. ಸಂಸದ ತೇಜಸ್ವಿ ಸೂರ್ಯ ಒಳ್ಳೆಯ ವ್ಯಕ್ತಿ. ಆದರೇ, ಅವರ ಮೈಯ್ಯಲ್ಲಿ ಗೋಲ್ವಳ್ಕರ್ ತರದ ದೆವ್ವ ಹೊಕ್ಕಾಗ, ಪಂಚರ್ ಹಾಕೋರು ಎಂಬ ಮಾತುಗಳು ಹೊರಬರುತ್ತವೆ ಎಂದು ಕುಂ ವೀರಭದ್ರಪ್ಪ ವ್ಯಂಗ್ಯ ಮಾಡಿದ್ದಾರೆ.
ಶಾಸಕ ರೇಣುಕಾಚಾರ್ಯ ಒಳ್ಳೆಯವನು. ಆದರೇ, ಅವರ ಮೈಯ್ಯಲ್ಲಿ ದೆವ್ವ ಹೊಕ್ಕುತ್ತದೆ. ಆಗ ಅವರು ಹೇಳಿಕೆ ಕೊಡ್ತಾರೆ. ಅದೇ ರೀತಿಯಲ್ಲಿ ಯತ್ನಾಳ್ ಕೂಡಾ. ಅವರು ಪಾಕಿಸ್ತಾನಕ್ಕೆ ಹೋಗಿ ಅಂತಾ ವಿಚಿತ್ರ ಹೇಳಿಕೆ ನೀಡುತ್ತಾರೆ. ಆದರೇ ಪಾಕಿಸ್ತಾನ ಕಸದ ಗುಂಡಿ ಅಲ್ಲ,ದಾಯಾದಿ ದೇಶ ಎಂಬುದನ್ನು ನೆನಪಲ್ಲಿ ಇಟ್ಟುಕೊಳ್ಳಬೇಕು ಎಂದಿದ್ದಾರೆ.
ಮಹಮ್ಮದ್ ಆಲಿ ಜಿನ್ನಾ ಮುಸ್ಲಿಂ ಅಲ್ಲ.ಆತ ಕನವರ್ಟೆಡ್ ಮುಸ್ಲಿಂ. ನಮ್ಮ ಡಿಎನ್ಎ, ಮುಸ್ಲಿಮರ ಡಿಎನ್ಎ ಚೆಕ್ ಮಾಡಿದರೆ ಒಂದೇ ಇರುತ್ತದೆ. ಆದರೇ ನಾನು ಈ ಕ್ಷಣದಲ್ಲಿ ಘೋಷಣೆ ಮಾಡುತ್ತೇನೆ.. ನಾನು ಹಿಂದೂ ಅಲ್ಲ. ನಾನು ಲಿಂಗಾಯತ, ಬಸವಣ್ಣನ ಅನುಯಾಯಿ ಎಂದು ಕುಂ ವೀರಭದ್ರಪ್ಪ ಘೋಷಿಸಿದ್ದಾರೆ.
ಮಹಮದ್ ಘೋರಿಯಂತವರೆಲ್ಲ ಸೋಮನಾಥ ಪುರ ದೇವಸ್ಥಾನಗಳನ್ನು ಲೂಟಿ ಮಾಡಿದರು. ದೇವಸ್ಥಾನಗಳಲ್ಲಿ ಅಡಗಿಸಿಟ್ಟಿದ್ದ ಕಪ್ಪು ಹಣವನ್ನು ಅವರು ಲೂಟಿ ಮಾಡಿದರು ಎಂದು ಹೊಸದಾಗಿ ವ್ಯಾಖ್ಯಾನ ಮಾಡಿದ್ದಾರೆ.
ಔರಂಗಜೇಬ್ ಒಬ್ಬ ಸಾಮ್ರಾಟ್.. ಆತನನ್ನು ಕಳ್ಳನ ರೀತಿ ಚಿತ್ರೀಸಿರೋದು ಸರಿಯಲ್ಲ ಎಂದು ಕುಂವಿ ಅಭಿಪ್ರಾಯಪಟ್ಟಿದ್ದಾರೆ..