ಮಹಾರಾಷ್ಟ್ರದಲ್ಲಿ ಉದ್ಧವ್ ಠಾಕ್ರೆ ಸರ್ಕಾರ ಬೀಳುವುದು ಖಚಿತ. ಸರ್ಕಾರ ಪತನಕ್ಕೆ ಕ್ಷಣಗಣನೆ ಆರಂಭ ಆಗಿದೆ. ಇವತ್ತು ಮಹಾರಾಷ್ಟ್ರದಲ್ಲಿ ಏನೆಲ್ಲ ಆಯ್ತು ಎಂಬ ವಿವರ ಇಲ್ಲಿದೆ.
ಶಿವಸೇನೆ ಇಬ್ಭಾಗ :
ಶಿವಸೇನೆ ಸ್ಥಾಪನೆ ಆಗಿ ಮೂರು ದಿನಗಳ ಹಿಂದೆಯಷ್ಟೇ 56 ವರ್ಷ ಆಗಿದ್ದಷ್ಟೇ. ಅರ್ಧಶತಮಾನದ ಇತಿಹಾಸ ಹೊಂದಿರುವ ಸದ್ಯ 55 ಶಾಸಕರನ್ನು ಹೊಂದಿರುವ ಶಿವಸೇನೆ ಇಬ್ಭಾಗ ಆಗಿದೆ. ಒಂದು ವೇಳೆ ಪಕ್ಷಾಂತರ ಕಾಯ್ದೆಯಿಂದ ಪಾರಾಗಲು, ಅನರ್ಹತೆಯಿಂದ ಪಾರಾಗಲು ಮೂರನೇ ಎರಡರಷ್ಟು ಶಾಸಕರು ಬಂಡಾಯ ಬಣದಲ್ಲಿರಬೇಕು.
ಸದ್ಯಕ್ಕೆ ಏಕನಾಥ್ ಶಿಂಧೆ ಬಣದಲ್ಲಿ ಶಿವಸೇನೆಯ ಮೂವತ್ತು ಶಾಸಕರು ಮತ್ತು ನಾಲ್ವರು ಪಕ್ಷೇತರ ಶಾಸಕರಿದ್ದಾರೆ. ಇನ್ನೂ ನಾಲ್ವರು ಶಿವಸೇನೆ ಶಾಸಕರು ತಮ್ಮ ಬಣ ಸೇರಿಕೊಳ್ಳಲಿದ್ದಾರೆ ಎಂದು ಶಿಂಧೆ ಹೇಳಿದ್ದಾರೆ. ಒಂದು ವೇಳೆ 55 ಶಾಸಕರ ಪೈಕಿ 37 ಶಾಸಕರು 37 ಶಾಸಕರು ಶಿಂಧೆ ಬಣದಲ್ಲಿ ಕಾಣಿಸಿಕೊಂಡರೆ ಆಗ ಶಿಂಧೆ ಶಿವಸೇನೆಯನ್ನು ಕಾನೂನುಬದ್ಧವಾಗಿಯೇ ವಿಭಜನೆ ಮಾಡಬಹುದಾಗಿದೆ.
ಉದ್ಧವ್ ಠಾಕ್ರೆ ವಿರುದ್ಧವೇ 34 ಶಾಸಕರ ಅವಿಶ್ವಾಸ :
ಸಿಎಂ ಉದ್ಧವ್ ಠಾಕ್ರೆ ವಿರುದ್ಧ ಬಂಡಾಯ ಎದ್ದು ಈಗ ಅಸ್ಸಾಂನ ಗುವಾಹಟಿಯ ರೆಸಾರ್ಟ್ನಲ್ಲಿರುವ ಶಿವಸೇನೆಯ 30 ಶಾಸಕರು ಮತ್ತು ನಾಲ್ವರು ಪಕ್ಷೇತರ ಶಾಸಕರು ಏಕನಾಥ್ ಶಿಂಧೆ ಅವರನ್ನು ಶಾಸಕಾಂಗ ಪಕ್ಷದ ನಾಯಕ ಎಂದು ಘೋಷಿಸಿ ರಾಜ್ಯಪಾಲ ಕೋಶಿಯಾರಿಗೆ ಪತ್ರ ಬರೆದಿದ್ದಾರೆ. ಈ ಮೂಲಕ ಸಿಎಂ ಉದ್ಧವ್ ಠಾಕ್ರೆ ವಿರುದ್ಧ ಅವರದ್ದೇ ಪಕ್ಷದ ಅರ್ಧಕ್ಕೂ ಹೆಚ್ಚು ಶಾಸಕರು ಅವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಈ ಮೂಲಕ ಉದ್ಧವ್ ಠಾಕ್ರೆ ಸಿಎಂ ಆಗಿ ಮುಂದುವರಿಯಲು ಬಹುಮತ ಕಳೆದುಕೊಂಡಿದ್ದಾರೆ.
ಶಿವಸೇನೆ, ಎನ್ಸಿಪಿ ಮತ್ತು ಕಾಂಗ್ರೆಸ್ ಹಾಗೂ ಸಣ್ಣಪುಟ್ಟ ಪಕ್ಷಗಳು ಮತ್ತು ಪಕ್ಷೇತರ ಶಾಸಕರ ಇವರೆಲ್ಲರ ಒಟ್ಟು ಬಲ ಸೇರಿಸಿದ್ರೆ ಮಹಾಮೈತ್ರಿಕೂಟದ ಬಲ 169 ಆಗುತ್ತದೆ. ಇವರಲ್ಲಿ 34 ಶಾಸಕರು ಅವಿಶ್ವಾಸ ಉದ್ಧವ್ ಠಾಕ್ರೆ ನೇತೃತ್ವದ ಸರ್ಕಾರದ ವಿರುದ್ಧ ಅವಿಶ್ವಾಸ ವ್ತಕ್ತಪಡಿಸಿದ್ದರಿಂದ ಸರ್ಕಾರದ ಬಹುಮತ 134. ಬಹುಮತಕ್ಕೆ ಬೇಕಿರುವುದು 145 ಶಾಸಕರ ಬೆಂಬಲ.
ರಾಜೀನಾಮೆ ಕೊಡಲು ಸಿದ್ಧ:
ತಮ್ಮದೇ ಪಕ್ಷದವರು ತಮ್ಮ ವಿರುದ್ಧ ಬಂಡೆದ್ದ ಬಳಿಕ ಇವತ್ತು ಸಂಜೆ ರಾಜ್ಯವನ್ನುದ್ದೇಶಿಸಿ ಮಾತಾಡಿರುವ ಉದ್ಧವ್ ಠಾಕ್ರೆ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಲು ಸಿದ್ಧ ಎಂದು ಘೋಷಿಸಿದ್ದಾರೆ. ರಾಜೀನಾಮೆ ಕೊಡುವ ಬಗ್ಗೆ ಮಾತಾಡಿರುವ ಠಾಕ್ರೆ ಕೆಲವು ಷರತ್ತುಗಳನ್ನು ಮುಂದಿಟ್ಟಿದ್ದಾರೆ.
1) ನನ್ನ ರಾಜೀನಾಮೆ ಪತ್ರ ಸಿದ್ಧವಿದೆ. ಆದ್ರೆ ಒಂದು ವೇಳೆ ನಾನು ರಾಜೀನಾಮೆ ಕೊಟ್ಟರೆ ಮತ್ತೆ ಶಿವಸೇನೆಯವರೇ ಮುಖ್ಯಮಂತ್ರಿ ಆಗ್ಬೇಕು.
2) ಶಿವಸೇನೆ ಸೈನಿಕರು ನನ್ನನ್ನು ಖುದ್ದು ಭೇಟಿ ಆಗಿ ನಾನು ಯಾಕೆ ರಾಜೀನಾಮೆ ನೀಡಬಾರದು ಎಂದು ಹೇಳಬೇಕು.
3) ಕೋವಿಡ್ ಸಂಕಷ್ಟದ ಮಧ್ಯೆಯೂ ನಾನು ಚೆನ್ನಾಗಿ ಕೆಲಸ ಮಾಡಿಲ್ಲ ಮತ್ತು ನಾನು ಆ ಹುದ್ದೆಗೆ ಸೂಕ್ತ ವ್ಯಕ್ತಿ ಅಲ್ಲವೇ ಎನ್ನುವುದನ್ನು ಹೇಳಬೇಕು.
ಶಾಸಕರನ್ನ ಬಲವಂತವಾಗಿ ಎಳೆದೊಯ್ದ ಪೊಲೀಸರು..!
ಬಿಜೆಪಿ ಆಡಳಿತ ಇರುವ ಗುಜರಾತ್ನ ಸೂರತ್ ಲೇ ಮೆರಿಡಿಯನ್ ರೆಸಾರ್ಟ್ನಲ್ಲಿದ್ದ ಶಿವಸೇನೆ ಶಾಸಕರನ್ನು ರಾತ್ರೋರಾತ್ರಿ ಬಿಜೆಪಿ ಆಡಳಿತವಿರುವ ಅಸ್ಸಾಂಗೆ ಕರೆದುಕೊಂಡು ಹೋಗಲಾಗಿದೆ. ಗುಜರಾತ್ ಪೊಲೀಸರೇ ಬಲವಂತವಾಗಿ ಕೆಲವು ಶಾಸರಕನ್ನು ವಿಮಾನ ನಿಲ್ದಾಣದಲ್ಲಿ ಎಳೆದೊಯ್ದಿದ್ದಾರೆ. ಗುಜರಾತ್ ಪೊಲೀಸರು ಶಿವಸೇನೆಯನ್ನು ಎಳೆದೊಯ್ಯುತ್ತಿರುವ ದೃಶ್ಯವನ್ನು ಪ್ರಮುಖ ಸುದ್ದಿವಾಹಿನಿ ಎನ್ಡಿಟಿವಿ ವರದಿಗಾರ ಮತ್ತು ಕ್ಯಾಮರಾಮ್ಯಾನ್ ಕ್ಯಾಮರಾದಲ್ಲಿ ಸೆರೆ ಮಾಡಿದ್ದಾರೆ.
ಈ ಹಿಂದೆ 2019ರಲ್ಲಿ ಸರ್ಕಾರ ರಚನೆಯ ಆರಂಭದಲ್ಲೂ ಎನ್ಸಿಪಿಯ ಅಸಮಾಧಾನಿತ ಶಾಸಕರು ಬಿಜೆಪಿ ಸರ್ಕಾರ ಇರುವ ಹರಿಯಾಣದ ರೆಸಾರ್ಟ್ನಲ್ಲಿ ತಂಗಿದ್ದರು. ಆ ರೆಸಾರ್ಟ್ಗೆ ನುಗ್ಗಿ ಎನ್ಸಿಪಿಯ ಯುವ ನಾಯಕರು ತಮ್ಮ ಶಾಸಕರನ್ನು ಮತ್ತೆ ಮುಂಬೈಗೆ ಕರೆದುಕೊಂಡು ಬಂದಿದ್ದರು. ಗುಜರಾತ್ಗೆ ಮಹಾರಾಷ್ಟçದ ಹತ್ತಿರದಲ್ಲೇ ಇರುವ ಕಾರಣ ಶಿವಸೇನೆ ನಾಯಕರು ಬರಬಹುದು ಎಂಬ ಕಾರಣಕ್ಕೆ ಅಸ್ಸಾಂಗೆ ಶಿಫ್ಟ್ ಆಗಿದ್ದಾರೆ.
ರೆಸಾರ್ಟ್ನಿಂದ ತಪ್ಪಿಸಿಕೊಂಡು ಬಂದ ಇಬ್ಬರು ಶಾಸಕರು..!
ವಿಷ ಕೊಟ್ಟು ಸಾಯಿಸಲು ಯತ್ನಿಸಿದ್ರಾ ಗುಜರಾತ್ ಪೊಲೀಸರು..?
ಇನ್ನು ಏಕನಾಥ್ ಶಿಂಧೆ ಬಣದಲ್ಲಿದ್ದ ಇಬ್ಬರು ಶಾಸಕರಾದ ಕೈಲಾಶ್ ಪಾಟೀಲ್ ಮತ್ತು ನಿತಿನ್ ದೇಶ್ಮುಖ್ ತಪ್ಪಿಸಿಕೊಂಡು ಬಂದಿದ್ದಾರೆ. `ಗುಜರಾತ್ ಪೊಲೀಸರು ತಮ್ಮನ್ನು ಬಿಡಲಿಲ್ಲ. ಆಸ್ಪತ್ರೆಯಲ್ಲಿ ವಿಷಕಾರಿ ಇಂಜೆಕ್ಷನ್ ಚುಚ್ಚಿ ನನ್ನನ್ನು ಕೊಲ್ಲಲು ಗುಜರಾತ್ ಪೊಲೀಸರು ಸಂಚು ರೂಪಿಸಿದ್ದರು’ ಎಂದು ನಿತಿನ್ ದೇಶ್ಮುಖ್ ಹೇಳಿದ್ದಾರೆ.
ಶರದ್ ಪವಾರ್-ಉದ್ಧವ್ ಠಾಕ್ರೆ ಮಾತುಕತೆ:
ಉದ್ಧವ್ ಠಾಕ್ರೆ ಅವರ ರಾಜ್ಯ ಭಾಷಣದ ಬಳಿಕ ಎನ್ಸಿಪಿ ನಾಯಕ ಶರದ್ ಪವಾರ್ ಮತ್ತು ಸಿಎಂ ಠಾಕ್ರೆ ಅವರು ಮಹತ್ವದ ಮಾತುಕತೆಯನ್ನು ನಡೆಸಿದ್ದಾರೆ.