ಬೊಮ್ಮಾಯಿ ಮೋಸದಿಂದ ಸೋತೆ – ಎಂಟಿಬಿ ನಾಗರಾಜ್ ನೇರ ಆರೋಪ

ಹೊಸಕೋಟೆ ವಿಧಾನಸಭಾ ಕ್ಷೇತ್ರದಲ್ಲಿ ತಾವು ಸೋಲಲು ಮಾಜಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮಾಡಿದ ಮೋಸವೇ ಕಾರಣ ಎಂದು ಮಾಜಿ ಸಚಿವ ಎಂಟಿಬಿ ನಾಗರಾಜ್ ಸ್ಫೋಟಕ ಆರೋಪ ಮಾಡಿದ್ದಾರೆ.

ಹೊಸಕೋಟೆಯಲ್ಲಿ ನಡೆದ ಆತ್ಮಾವಲೋಕನ ಸಭೆಯಲ್ಲಿ ಮಾತನಾಡಿದ ಅವರು,

ವಿಧಾನಸಭೆ ಚುನಾವಣೆಯಲ್ಲಿ ನನ್ನ ಸೋಲಿಗೆ ಪ್ರಮುಖ ಕಾರಣ ಡಾ.ಕೆ.ಸುಧಾಕರ್. ಬರೀ ಅವರು ಮಾತ್ರ ಅಲ್ಲ.. ಮುಖ್ಯಮಂತ್ರಿಯಾಗಿದ್ದ ಬಸವರಾಜ ಬೊಮ್ಮಾಯಿ ಸಹ ನನ್ನ ಸೋಲಿಗೆ ಕಾರಣರಾದರು. ಅವರೂ ನನಗೆ ಮೋಸ ಮಾಡಿದರು..

ಎಂದು ಆರೋಪ ಮಾಡಿದರು.

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಉಸ್ತುವಾರಿಯನ್ನು ನನಗೆ ನೀಡುವ ಬದಲು ಡಾ.ಕೆ ಸುಧಾಕರ್​ಗೆ ನೀಡಿದರು ಈ ಮೂಲಕ ಕ್ಷೇತ್ರದ ಅಭಿವೃದ್ಧಿಗೆ ಶ್ರಮಿಸುವ ಸುವರ್ಣ ಅವಕಾಶವನ್ನು ಮುಖ್ಯಮಂತ್ರಿಯಾಗಿದ್ದ ಬಸವರಾಜ ಬೊಮ್ಮಾಯಿ ತಪ್ಪಿಸಿದರು.

ಹೊಸಕೋಟೆ ತಾಲೂಕಿನ ಪಕ್ಷದ ಮುಖಂಡರಿಗೆ ನಿಗಮ,ಮಂಡಳಿಗಳ ಅಧ್ಯಕ್ಷ ಸ್ಥಾನ ಸೇರಿ ಯಾವುದೇ ಸ್ಥಾನಮಾನಗಳನ್ನು ಮುಖ್ಯಮಂತ್ರಿಯಾಗಿದ್ದ ಬಸವರಾಜ ಬೊಮ್ಮಾಯಿ ನೀಡಲಿಲ್ಲ. ಸ್ಥಳೀಯರಿಗೆ ಅವಕಾಶ ನೀಡಿದ್ದರೇ ನನ್ನ ಕೈ ಇನ್ನಷ್ಟು ಬಲಗೊಳ್ಳುತ್ತಿತ್ತು. ಆದರೆ, ಹಾಗೆ ಆಗಲಿಲ್ಲ

ಎಂದು ಎಂಟಿಬಿ ನಾಗರಾಜ್ ಬೇಸರ ವ್ಯಕ್ತಪಡಿಸಿದರು.

 ಮುಸ್ಲಿಮರು ನನಗೆ ಕೈಕೊಟ್ಟರು:ಬಿಜೆಪಿ ನೋಟು ಪಡೆದು.. ಕಾಂಗ್ರಸ್​ಗೆ ವೋಟು ಹಾಕಿದರು

ನಾನು ಅಪಾರವಾಗಿ ನಂಬಿದ್ದ ಅಲ್ಪಸಂಖ್ಯಾತರು ನನಗೆ ಚುನಾವಣೆಯಲ್ಲಿ ಮೋಸ ಮಾಡಿದರು. ನನಗೆ ಮತ ನೀಡುವುದಾಗಿ ಕುರಾನ್, ಅಲ್ಲಾಹ್ ಮೇಲೆ ಆಣೆ ಪ್ರಮಾಣ ಮಾಡಿದ್ದರು. ಆದರೆ, ಅವರು ನನಗೆ ಮತ ನೀಡದೇ ಮೋಸ ಮಾಡಿದರು. ಬಿಜೆಪಿ ನೋಟು ಪಡೆದು.. ಕಾಂಗ್ರಸ್​ಗೆ ವೋಟು ಹಾಕಿದರು. ಅವರನ್ನು ಇನ್ನೆಂದಿಗೂ ನಂಬುವುದಿಲ್ಲ ಎಂದು ಮನದ ಬೇಗುದಿಯನ್ನು ಎಂಟಿಬಿ ನಾಗರಾಜ್​ ಹೊರಹಾಕಿದರು.