ಹೊಸ ಸಂಸತ್​ ಭವನ ಉದ್ಘಾಟಿಸಿದ ಪ್ರಧಾನಿ ಮೋದಿ

ಭಾರತದ ಹೊಸ ಸಂಸತ್​ ಭವನದ ಲೋಕಾರ್ಪಣೆ ಆಗಿದೆ. ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರು ಹೊಸ ಸಂಸತ್​ ಭವನವನ್ನು ಲೋಕಾರ್ಪಣೆ ಮಾಡಿದ್ದಾರೆ.

ಪ್ರಧಾನಿ ಅವರಿಗೆ ಲೋಕಸಭಾ ಸ್ಪೀಕರ್​ ಓಂ ಬಿರ್ಲಾ ಅವರ ಜೊತೆಯಾಗಿದ್ದರು.

ಹೊಸ ಸಂಸತ್​ ಭವನದಲ್ಲಿ ಸ್ಪೀಕರ್​ ಪೀಠದ ಪಕ್ಕದಲ್ಲಿ ರಾಜದಂಡವನ್ನು ಪ್ರತಿಷ್ಠಾಪಿಸಿದ ಬಳಿಕ ಸಂಸತ್​​ ಭವನದ ಉದ್ಘಾಟನೆ ನಡೆಯಿತು.

ತಮಿಳುನಾಡಿನ ತಿರುವಾವದುತ್ತುರೈ ಆಧೀನಮ್​ನ ಸ್ವಾಮೀಜಿಗಳು ನಿನ್ನೆಯಷ್ಟೇ ಪ್ರಧಾನಿ ಮೋದಿ ಅವರಿಗೆ ಈ ರಾಜದಂಡವನ್ನು ಹಸ್ತಾಂತರ ಮಾಡಿದ್ದರು.

ಬೆಳಗ್ಗೆ 7 ಗಂಟೆಗೆ ಹೊಸ ಸಂಸತ್​ ಭವನಕ್ಕೆ ಆಗಮಿಸಿದ ಪ್ರಧಾನಿ ಮೋದಿಯವರು ಸಂಸತ್​ ಭವನದ ಆವರಣದಲ್ಲಿರುವ ರಾಷ್ಟ್ರಪಿತ ಮಹಾತ್ಮ ಗಾಂಧಿ ಅವರ ಪುತ್ಥಳಿಗೆ ನಮಸ್ಕರಿಸಿದರು.

ಬಳಿಕ ಹೊಸ ಸಂಸತ್ತಿನಲ್ಲಿ ವಾದ್ಯ, ಮಂತ್ರ-ಘೋಷಗಳೊಂದಿಗೆ ಪೂಜೆ ನೆರವೇರಿತು. ಈ ಪೂಜೆಯಲ್ಲಿ ಪ್ರಧಾನಿಯವರ ಪಕ್ಕದಲ್ಲಿ ಲೋಕಸಭಾ ಸ್ಪೀಕರ್​ ಕೂಡಾ ಆಸೀನರಾಗಿದ್ದರು.

ರಾಜದಂಡಕ್ಕೆ ಪ್ರಧಾನಿ ಮೋದಿಯವರು ಸಾಷ್ಟಾಂಗ ನಮಸ್ಕಾರ ಕೂಡಾ ಮಾಡಿದರು.

ಪೂಜೆಯ ಬಳಿಕ ಪ್ರಧಾನಿಯವರು ರಾಜದಂಡವನ್ನು ಸ್ಪೀಕರ್​ ಪೀಠದ ಪಕ್ಕದಲ್ಲಿ ಇಟ್ಟರು.

ಹೊಸ ಸಂಸತ್​ ಭವನದಲ್ಲಿ ಸರ್ವಧರ್ಮ ಕಾರ್ಯಕ್ರಮ ಕೂಡಾ ನೆರವೇರಿತು.