ಪಿಎಸ್ಐ ನೇಮಕಾತಿ ಹಗರಣದಲ್ಲಿ ಸಿಐಡಿ ವಶಪಡಿಸಿಕೊಂಡಿರುವ ಐಪಿಎಸ್ ಅಧಿಕಾರಿ ಅಮೃತ್ಪಾಲ್ ಅವರು ಬರೆದಿಟ್ಟಿರುವ ಡೈರಿಯಲ್ಲಿ ಐವರು ಮಂತ್ರಿಗಳ ಹೆಸರು ಇದೆ ಎಂದು ಬೆಂಗಳೂರು ವಕೀಲರ ಸಂಘದ ಮಾಜಿ ಅಧ್ಯಕ್ಷ ಎ ಪಿ ರಂಗನಾಥ್ ಗಂಭೀರ ಆರೋಪ ಮಾಡಿದ್ದಾರೆ.
ಪೊಲೀಸ್ ನೇಮಕಾತಿ ವಿಭಾಗದ ಎಡಿಜಿಪಿ ಅಮೃತ್ಪಾಲ್ ಡೈರಿ ಅವರ ಕಚೇರಿಯಲ್ಲಿ ಸಿಕ್ಕಿದೆ. ಆ ಡೈರಿಯಲ್ಲಿ 163 ಅಭ್ಯರ್ಥಿಗಳ ಹೆಸರಿದೆ. ಆ ಐದು ಜನ ಮಂತ್ರಿಗಳನ್ನು ತನಿಖೆ ಮಾಡ್ಬೇಕು. ಮೂವರು ಐಪಿಎಸ್, ಐಎಎಸ್ ಅಧಿಕಾರಿಗಳ ಹೆಸರಿದೆ. ಅಮೃತ್ಪಾಲ್ ಅವರನ್ನು ಬಂಧಿಸಬೇಕು, ವಿಚಾರಣೆ ನಡೆಸಬೇಕು ಎಂದು ಎ ಪಿ ರಂಗನಾಥ್ ಆರೋಪಿಸಿದ್ದಾರೆ.
ಡೈರಿಯಲ್ಲಿರುವ ಮಂತ್ರಿಗಳ ಹೆಸರನ್ನು ಬಹಿರಂಗಪಡಿಸುವುದಾಗಿ ಅಮೃತ್ಪಾಲ್ ಅವರು ಸರ್ಕಾರಕ್ಕೆ ಹೆದರಿಸುತ್ತಿದ್ದಾರೆ. ಐವರು ಮಂತ್ರಿಗಳು ಹಗರಣದಲ್ಲಿ, ಕೇವಲ ಅಶ್ವತ್ಥ್ ನಾರಾಯಣ್ ಮಾತ್ರವಲ್ಲ, ಇದರಲ್ಲಿ ಬೆಂಗಳೂರಿನ ಇಬ್ಬರು ಮಂತ್ರಿಗಳೂ ಇದ್ದಾರೆ ಎಂದು ಸಿಐಡಿ ಕಚೇರಿ ಎದುರು ವಕೀಲ ರಂಗನಾಥ್ ಅವರು ಆರೋಪಿಸಿದ್ದಾರೆ.
ರಂಗನಾಥ್ ಅವರ ಮಾಧ್ಯಮಗೋಷ್ಠಿ ನಡುವೆ ಮಧ್ಯಪ್ರವೇಶಿಸಿದ ಅಲ್ಲಿದ್ದ ಪೊಲೀಸರು ಅವರನ್ನು ಅಲ್ಲಿಂದ ಎಳೆದುಕೊಂಡು ಹೋದರು.