ಕರ್ನಾಟಕದಲ್ಲಿ ‘ರಾಜ್ಯ ರೈತ ಸಂಘ’ ಹಾಗೂ ‘ಆಮ್ ಆದ್ಮಿ ಪಾರ್ಟಿ’ ಚುನಾವಣಾ ಪೂರ್ವ ಮೈತ್ರಿ ಘೋಷಣೆ

ರಾಜ್ಯದಲ್ಲಿ ಮುಂದಿನ ವಿಧಾನಸಭೆಗೆ ರಾಜ್ಯ ರೈತ ಸಂಘ ಹಾಗೂ ಆಮ್ ಆದ್ಮಿ ಪಕ್ಷ ಚುನಾವಣಾ ಪೂರ್ವ ಮೈತ್ರಿ ಘೋಷಿಸಿವೆ.

ಇಂದು ಗುರುವಾರ ಬೆಂಗಳೂರಿನಲ್ಲಿ ರಾಜ್ಯ ರೈತ ಸಂಘ ಬೃಹತ್ ಸಮಾವೇಶ ಮಾಡಿದೆ. ಈ ಸಮಾವೇಶಕ್ಕೆ ದೆಹಲಿ ಮುಖ್ಯಮಂತ್ರಿ ಹಾಗೂ ಆಮ್ ಆದ್ಮಿ ಪಕ್ಷದ ರಾಷ್ಟ್ರೀಯ ಸಂಚಾಲಕ ಅರವಿಂದ್ ಕೇಜ್ರಿವಾಲ್ ಅವರು ಚಾಲನೆ ನೀಡಿದ್ದಾರೆ.

ಏ.21 ರಂದು ರೈತರ ಬೃಹತ್ ಸಮಾವೇಶ ಮಾಡಿ ನೂತನ ಪಕ್ಷ ಘೋಷಣೆ ಮಾಡುತ್ತೇವೆ ಎಂದು ರೈತ ನಾಯಕ ಕೋಡಿಹಳ್ಳಿ ಚಂದ್ರಶೇಖರ್ ಅವರು ಈ ಮೊದಲೇ ಹೇಳಿದ್ದರು.

ಮುಂದಿನ ಬಾರಿ ಕರ್ನಾಟಕದಲ್ಲಿ ಆಮ್ ಆದ್ಮಿ ಪಕ್ಷ ಮತ್ತು ರೈತ ಸಂಘದ ಸರ್ಕಾರ ಬರಬೇಕು ಎಂಬ ಘೋಷಣೆಯನ್ನು ರೈತ ಸಂಘದ ಮುಖಂಡರು ಘೋಷಣೆ ಮೊಳಗಿಸಿದ್ದಾರೆ. ಇದು ಬಿಳಿ ಬಣ್ಣಗಳ ಸಮ್ಮಿಲನ ಎಂದು ರೈತ ಮುಖಂಡರು ಹೇಳಿದ್ದಾರೆ

ಈ ಮೂಲಕ ಕರ್ನಾಟಕದಲ್ಲಿ 2023 ರ ರಲ್ಲಿ ನಡೆಯಲಿರುವ ಚುನಾವಣೆ ಕುತೂಹಲಕ್ಕೆ ಕಾರಣವಾಗಿದೆ. ಆಮ್ ಆದ್ಮಿ ಪಕ್ಷ ಪಂಜಾಬ್ ರಾಜ್ಯದಲ್ಲಿ ಅಧಿಕಾರಕ್ಕೆ ಬಂದ ಬೆನ್ನಲ್ಲೇ, ಹುರುಪನ್ನು ಹೆಚ್ಚಿಸಿಕೊಂಡು ದೇಶಾದ್ಯಂತ ತನ್ನ ಪಕ್ಷವನ್ನು ವಿಸ್ತರಿಸುತ್ತಿದೆ. ಆ ನಿಟ್ಟಿನಲ್ಲಿ ರಾಜ್ಯದಲ್ಲಿ ಆಮ್ ಆದ್ಮಿ ಪಕ್ಷ ದಿನದಿಂದ ದಿನಕ್ಕೆ ಬೆಳೆಯುತ್ತಿದೆ. ಈಗಾಗಲೇ ಭಾಸ್ಕರ್ ರಾವ್ ಹಾಗೂ ಕೆ.ಮಥಾಯಿಯಂತಹ ನಿವೃತ್ತ ಅಧಿಕಾರಿಗಳು ಆಮ್ ಆದ್ಮಿ ಪಕ್ಷದತ್ತ ಮುಖ ಮಾಡಿದ್ದಾರೆ.