ಹತ್ತನೇ ತರಗತಿಯ ಪರಿಷ್ಕೃತ ಪಠ್ಯಪುಸ್ತಕ ವಿವಾದ ಮತ್ತಷ್ಟು ತಾರಕಕ್ಕೇರಿದ್ದು, ಶಿಕ್ಷಣ ಸಚಿವ ಬಿ ಸಿ ನಾಗೇಶ್ ಅವರ ರಾಜೀನಾಮೆಗೆ ಆಗ್ರಹಿಸಿ ಭಾನುವಾರ ಸಂಜೆ 5 ಕ್ಕೆ ಕನ್ನಡಪರ ಸಂಘಟನೆಗಳು ಟ್ವಿಟ್ಟರ್ ಅಭಿಯಾನ ಘೋಷಿಸಿವೆ.
#RejectRSSTextBooks ಮತ್ತು #RejectBrahminTextBooks ಎಂಬ ಹ್ಯಾಸ್ ಟ್ಯಾಗ್ನಡಿ ಟ್ವಿಟ್ಟರ್ ಅಭಿಯಾನ ನಡೆಯುತ್ತಿde. ಅನರ್ಹ ಸಮಿತಿಯನ್ನು ರಚಿಸಿ ಮಕ್ಕಳ ಭವಿಷ್ಯವನ್ನು ಹಾಳುಮಾಡಿರುವ ಸಚಿವ ಬಿ ಸಿ ನಾಗೇಶ್ ಅವರ ರಾಜೀನಾಮೆಗೆ ಒತ್ತಾಯಿಸಿ ಟ್ವಿಟ್ಟರ್ ಅಭಿಯಾನ ಎಂದು ಪೋಸ್ಟರ್ನಲ್ಲಿ ಉಲ್ಲೇಖಿಸಲಾಗಿದೆ.
ಜೊತೆಗೆ ಜಿ.ರಾಮಕೃಷ್ಣ ಅವರ ʼಭಗತ್ ಸಿಂಗ್ʼ, ಪತ್ರಕರ್ತ ಮತ್ತು ಲೇಖಕ ಪಿ ಲಂಕೇಶ್ ಅವರ ‘ಮೃಗ ಮತ್ತು ಸುಂದರಿ’, ಸಾ ರಾ ಅಬೂಬಕ್ಕರ್ ಅವರ ‘ಯುದ್ಧ’, ಎ ಎನ್ ಮೂರ್ತಿ ರಾವ್ ಅವರ ‘ವ್ಯಾಘ್ರಗೀತೆʼ, ಶಿವಕೋಟ್ಯಾಚಾರ್ಯ ಅವರ ‘ಸುಕುಮಾರ ಸ್ವಾಮಿಯ ಕಥೆ’, ಸಮಿತಿ ರಚನೆಯಿಂದ ʼಸ್ವಾಮಿ ವಿವೇಕಾನಂದ ಚಿಂತನೆಗಳುʼ ಹಾಗೂ ಸಂಗ್ರಹದಿಂದ ಆಯ್ದ ʼಜಾನಪದ ಒಗಟುಗಳುʼ ಪಠ್ಯಗಳನ್ನು ಪರಿಷ್ಕೃತ ಪಠ್ಯಪುಸ್ತಕದಿಂದ ಕೈಬಿಡಲಾಗಿದೆ.
ರಾಜ್ಯ ಸರ್ಕಾರವು ಮಹತ್ವದ ಲೇಖಕರ ಪಠ್ಯಗಳನ್ನು ಕೈಬಿಟ್ಟು, ಆರ್ಎಸ್ಎಸ್ ಸಂಸ್ಥಾಪಕ ಕೇಶವ ಬಲಿರಾಮ್ ಹೆಡಗೇವಾರ್ ಭಾಷಣ ಸೇರ್ಪಡೆ ಮತ್ತು ಬ್ರಾಹ್ಮಣ ಸಮುದಾಯದ ಲೇಖಕರ ಪಠ್ಯಗಳನ್ನು ಪರಿಷ್ಕೃತ ಪಠ್ಯದಲ್ಲಿ ಸೇರ್ಪಡೆಗೊಳಿಸಿರುವುದಕ್ಕೆ ಶೈಕ್ಷಣಿಕ ಮತ್ತು ಚಿಂತನಾ ವಲಯದಲ್ಲಿ ಈಗಾಗಲೇ ಭಾರೀ ವಿರೋಧ ವ್ಯಕ್ತವಾಗಿದೆ. ಪಠ್ಯಪುಸ್ತಕ ಮರು ಪರಿಷ್ಕರಣೆ ಖಂಡಿಸಿ ಸುಮಾರು 85 ಕ್ಕೂ ಹೆಚ್ಚು ಲೇಖಕರು ರಾಜ್ಯ ಸರ್ಕಾರಕ್ಕೆ ಬಹಿರಂಗ ಪತ್ರ ಬರೆದಿದ್ದಾರೆ.
ಕನ್ನಡ ನಾಡಿನ ಅಸ್ಮಿತೆ, ಕನ್ನಡ ಭಾಷೆಯ ಘನತೆಗಳನ್ನು ಗಾಳಿಗೆ ತೂರುವ ರೋಹಿತ್ ಚಕ್ರತೀರ್ಥರವರ ಸಮಿತಿ ಅದಕ್ಕೆ ಬದಲಾಗಿ ಆರ್ಎಸ್ಎಸ್ ಸ್ಥಾಪಕರಲ್ಲಿ ಒಬ್ಬರಾದ ಹೆಡಗೇವಾರ್ರ ʼನಿಜವಾದ ಆದರ್ಶ ಪುರುಷ ಯಾರಾಗಬೇಕು?ʼ, ಬನ್ನಂಜೆ ಗೋವಿಂದಾಚಾರ್ಯರವರ ʼಶುಕನಾಸನ ಉಪದೇಶʼ, ಶತಾವಧಾನಿ ಗಣೇಶ್ ಅವರ ʼಶ್ರೇಷ್ಠ ಭಾರತೀಯ ಚಿಂತನೆಗಳು ಹಾಗೂ ಶಿವಾನಂದ ಕಳವೆಯವರ ʼಸ್ವದೇಶಿ ಸೂತ್ರದ ಸರಳ ಹಬ್ಬʼ ಪಠ್ಯಗಳನ್ನು ಸೇರಿಸಲಾಗಿದೆ. ಯಾವ ಕಾರಣಕ್ಕೆ ಕನ್ನಡದ ಪ್ರಮುಖ ಲೇಖಕ, ಲೇಖಕಿಯರ ಪಠ್ಯಗಳನ್ನು ಕೈ ಬಿಟ್ಟಿದ್ದಾರೆ ಎನ್ನುವುದಕ್ಕೆ ಕಾರಣಗಳನ್ನು ನೀಡಿಲ್ಲ. ಒಟ್ಟಾರೆಯಾಗಿ ಪಠ್ಯಪುಸ್ತಕ ಪರಿಷ್ಕರಣೆ ಪಾರದರ್ಶಕತೆಯಿಂದ ಕಂಡುಬರುತ್ತಿಲ್ಲ ಎಂದು ಬಹಿರಂಗ ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.
ಈ ಎಲ್ಲ ಬೆಳವಣಿಗೆಯ ನಡುವೆ ಶಿಕ್ಷಣ ಸಚಿವ ಬಿ ಸಿ ನಾಗೇಶ್ ಅವರ ರಾಜೀನಾಮೆಗೆ ಆಗ್ರಹಿಸಿ ಇಂದು ಈ ಟ್ವಿಟ್ಟರ್ ಅಭಿಯಾನ ನಡೆಯುತ್ತಿದೆ.