ಸರ್ಕಾರವನ್ನು ಕೆಡವಿ – DCM ಪತ್ನಿಯ ವಾಟ್ಸಾಪ್ ​ಚ್ಯಾಟ್​ ಬಹಿರಂಗ

ಮಹಾರಾಷ್ಟ್ರದ ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನಾವೀಸ್​ ಪತ್ನಿ ಅಮೃತಾ ಫಡ್ನಾವೀಸ್​ ದಾಖಲಿಸಿದ್ದ ಸುಲಿಗೆ ಪ್ರಕರಣ ಸಂಬಂಧ ಪೊಲೀಸರು ಸಲ್ಲಿಸಿರುವ ಆರೋಪಪಟ್ಟಿಯಲ್ಲಿ ಸ್ಫೋಟಕ ಮಾಹಿತಿ ಬಯಲಾಗಿದೆ.

ಕ್ರಿಕೆಟ್​ ಬುಕ್ಕಿ ಅನಿಲ್​ ಜೈಸಿಂಘಾನಿ ಜೊತೆಗೆ ಅಮೃತಾ ಫಡ್ನಾವೀಸ್​ ಅವರು ನಡೆಸಿರುವ ವಾಟ್ಸಾಪ್​ ಚ್ಯಾಟ್​ನಲ್ಲಿ

ಮಹಾರಾಷ್ಟ್ರದಲ್ಲಿ ಅಧಿಕಾರದಲ್ಲಿದ್ದ ಮಹಾ ವಿಕಾಸ ಅಗಾಡಿ ಮೈತ್ರಿಕೂಟವನ್ನು ಉರುಳಿಸುವಂತೆಯೂ ಮತ್ತು ಈಗ ಮುಖ್ಯಮಂತ್ರಿ ಆಗಿರುವ ಏಕನಾಥ್​ ಶಿಂಧೆ ಮತ್ತು ಅನಿಲ್​ ಪರಬ್​ ಅವರನ್ನು ಖೆಡ್ಡಾಕ್ಕೆ ಕೆಡುವವಂತೆಯೂ ಹೇಳಿದ್ದರು

ಎಂದು ಬುಕ್ಕಿ ಸಿಂಘಾನಿ ಪೊಲೀಸರಿಗೆ ಸಲ್ಲಿಸಿರುವ ದಾಖಲೆಯಲ್ಲಿ ಹೇಳಿದ್ದಾನೆ.

ಕ್ರಿಕೆಟ್​ ಬುಕ್ಕಿ ಅನಿಲ್​ ಜೈ ಸಿಂಘಾನಿ ಮಗಳು ಅನಿಷ್ಕಾ 2021ರ ನವೆಂಬರ್​ನಲ್ಲಿ ಅಮೃತಾ ಫಡ್ನಾವೀಸ್​ರನ್ನು ಭೇಟಿಯಾಗಿದ್ದಳು.

ತಾನು ಬಟ್ಟೆ, ಪಾದರಕ್ಷೆ ಮತ್ತು ಬ್ಯಾಗ್​ಗಳನ್ನು ಡಿಸೈನ್​ ಮಾಡುತ್ತೇನೆ ಎಂದು ಪರಿಚಯಿಸಿಕೊಂಡಿದ್ದಳು. 27 ವರ್ಷದ ಕಾನೂನು ವಿದ್ಯಾರ್ಥಿನಿಯಾಗಿರುವ ಈಕೆ ತನಗೆ ತಾಯಿ ಇಲ್ಲವೆಂದೂ ತನ್ನ ಕುಟುಂಬಕ್ಕೆ ನೆರವಿನ ಅಗತ್ಯವಿದೆಯೆಂದೂ ಅಮೃತಾ ಫಡ್ನಾವೀಸ್​ ಅವರಿಗೆ ಹೇಳಿದ್ದಳು.

ಅಮೃತಾ ಫಡ್ನಾವೀಸ್​ ಅವರು ಈ ವರ್ಷದ ಫೆಬ್ರವರಿ 20ರಂದು ಕೊಟ್ಟ ದೂರಿನ ಪ್ರಕಾರ  ವಾಯ್ಸ್​ ಮೆಸೇಜ್​ ಮತ್ತು ವೀಡಿಯೋ ಕ್ಲಿಪ್​ಗಳನ್ನು ಬಹಿರಂಗಪಡಿಸುವುದಾಗಿ ಅನಿಷ್ಕಾ ಜೈಸಿಂಘಾನಿ ಬೆದರಿಕೆ ಹಾಕಿದ್ದಳು. 10 ಕೋಟಿ ರೂಪಾಯಿ ಕೊಡುವಂತೆಯೂ ಮತ್ತು ತನ್ನ ತಂದೆಯ ವಿರುದ್ಧದ ಎಲ್ಲ ಪ್ರಕರಣಗಳನ್ನೂ ತೆಗೆದುಹಾಕಬೇಕೆಂದು ಬೇಡಿಕೆ ಇಟ್ಟಿದ್ದಳು.

ಜೊತೆಗೆ ತನ್ನ ತಂದೆ ವಿರುದ್ಧ ಇರುವ ಹಲವು ಪ್ರಕರಣಗಳನ್ನು ತೆಗೆದುಹಾಕಲು 1 ಕೋಟಿ ರೂಪಾಯಿ ಆಮಿಷ ಒಡ್ಡಿದ್ದಳು, ಆದ್ರೆ ಅದನ್ನು ನಿರಾಕರಿಸಿದ್ದಾಗಿ ಅಮೃತಾ ಫಡ್ನಾವೀಸ್​ ನೀಡಿದ್ದ ದೂರಿನ ಮೇರೆಗೆ ಪೊಲೀಸರು ಎಫ್​ಐಆರ್​ ದಾಖಲಿಸಿಕೊಂಡಿದ್ದರು.