ಬ್ರಿಟನ್ ದೇಶದ ಲೇಬರ್ ಪಕ್ಷದ ನಾಯಕ ಜೆರೆಮಿ ಕರ್ಬಿನ್ ಅವರನ್ನು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಭೇಟಿ ಮಾಡಿದ್ದರ ಬಗ್ಗೆ ಈಗ ಬಿಜೆಪಿ ವಿವಾದ ಎಬ್ಬಿಸಿದೆ.
ರಾಹುಲ್ ಗಾಂಧಿ ಅವರು ಕಾಂಗ್ರೆಸ್ ಅನಿವಾಸಿ ಭಾರತೀಯರು ಘಟಕದ ಅಧ್ಯಕ್ಷ ಸ್ಯಾಮ್ ಪಿತ್ರೋಡಾ ಅವರ ಜೊತೆಗೆ ಕರ್ಬಿನ್ ಅವರನ್ನು ಭೇಟಿ ಮಾಡಿದ್ದರು.
ಈ ಬಗ್ಗೆ ಟ್ವೀಟಿಸಿದ್ದ ಬಿಜೆಪಿ ಸಾಮಾಜಿಕ ಜಾಲತಾಣ ವಿಭಾಗದ ಮುಖ್ಯಸ್ಥ ಅಮಿತ್ ಮಾಳವೀಯ
`ಬ್ರಿಟನ್ ಸಂಸದ, ಲೇಬರ್ ಪಕ್ಷದ ನಾಯಕ ಜೆರೆಮಿ ಕರ್ಬಿನ್ ಅವರನ್ನು ರಾಹುಲ್ ಗಾಂಧಿ ಭೇಟಿ ಮಾಡಿದ್ದಾರೆ. ಜೆರೆಮಿ ಅವರು ಭಾರತ ವಿರೋಧಿ, ಕಾಶ್ಮೀರ ಪ್ರತ್ಯೇಕ ಆಗಬೇಕು ಎಂಬ ಬೆಂಬಲಿಗ ಮತ್ತು ಹಿಂದೂ ವಿರೋಧಿ.
ಗಾಂಧಿಗೆ ಕೊನೆಗೂ ಅವರ ವಿದೇಶಿ ಪಾಲುದಾರ ಸಿಕ್ಕಿದ್ದಾರೆ, ಅವರಂತೆ ಇವರು ಕೂಡಾ ಭಾರತವನ್ನು ವಿಭಜನೆ ಮಾಡುತ್ತಿದ್ದಾರೆ’ ಎಂದು ಅಮಿತ್ ಮಾಳವೀಯ ಟ್ವೀಟಿಸಿದ್ದಾರೆ.
ದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಸಿದ್ದ ಬಿಜೆಪಿ ನಾಯಕರೂ ಇದೇ ವಿಷಯವನ್ನು ಮುಂದಿಟ್ಟುಕೊAಡು ಕಾಂಗ್ರೆಸ್ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ಪ್ರಧಾನಿ ಮೋದಿ ಭೇಟಿ, ಮೋದಿಯನ್ನು ಹೊಗಳಿದ್ದ ಕರ್ಬಿನ್:
ಆದರೆ ಪ್ರಧಾನಿ ನರೇಂದ್ರ ಮೋದಿಯವರು 7 ವರ್ಷಗಳ ಹಿಂದೆ ಇದೇ ಲೇಬರ್ ಪಕ್ಷದ ನಾಯಕ ಜೆರೆಮಿ ಕರ್ಬಿಯನ್ ಅವರನ್ನು ಭೇಟಿ ಆಗಿದ್ದರು.
ಪ್ರಧಾನಿ ಆಗಿ ಅಧಿಕಾರ ಸ್ವೀಕರಿಸಿದ ಬಳಿಕ 2015ರಲ್ಲಿ ಮೊದಲ ಬಾರಿಗೆ ಬ್ರಿಟನ್ ಪ್ರವಾಸ ಕೈಗೊಂಡ ವೇಳೆ ಬ್ರಿಟನ್ನಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದ ಕರ್ಬಿನ್ ಅವರನ್ನು ಮೋದಿ ಭೇಟಿ ಆಗಿ ಮಾತುಕತೆ ನಡೆಸಿದ್ದರು.
73 ವರ್ಷದ ಕರ್ಬಿನ್ ಬ್ರಿಟನ್ ವಿಪಕ್ಷ ಲೇಬರ್ ಪಾರ್ಟಿಯ ನಾಯಕ. ಕಾಶ್ಮೀರದಲ್ಲಿರುವ ಮಾನವ ಹಕ್ಕುಗಳ ಉಲ್ಲಂಘನೆ ಆಗುತ್ತಿದೆ ಎಂದು ಆರೋಪಿಸಿ ಆ ಬಗ್ಗೆ ಪ್ರಧಾನಿ ಮೋದಿ ಜೊತೆಗೆ ಪ್ರಧಾನಿ ಡೇವಿಡ್ ಕೆಮರೂನ್ ಚರ್ಚಿಸಬೇಕು ಎಂದು ಬ್ರಿಟನ್ ಸಂಸತ್ತಿನಲ್ಲಿ ನಿರ್ಣಯವನ್ನು ಮುಂದಿಟ್ಟ 46 ಸಂಸದರ ಪೈಕಿ ಕರ್ಬಿನ್ ಕೂಡಾ ಒಬ್ಬರು.
ವಿಶ್ವಸಂಸ್ಥೆಯಲ್ಲಿ ಪ್ರಧಾನಿ ಮೋದಿ ಮಾಡಿದ್ದ ಭಾಷಣ ಮತ್ತು ಹಮಾಮಾನ ವೈಪರೀತ್ಯ ಹಾಗೂ ಬಡತನ ನಿರ್ಮೂಲನೆಗೆ ಕೈಗೊಂಡಿರುವ ಕ್ರಮಗಳ ಬಗ್ಗೆ ಮೋದಿಯನ್ನು ಹೊಗಳಿದ್ದರು ಕರ್ಬಿನ್.